തിരുവനന്തപുരം: മുഖ്യമന്ത്രി പിണറായി വിജയന്റെ വിദേശയാത്രയെ കുറിച്ച് പ്രതികരിച്ച് ബിജെപി നേതാവ് പ്രകാശ് ജാവ്‌ദേക്കർ. മുഖ്യമന്ത്രി ആരുടെ ചിലവിലാണ് വിദേശത്ത് പോയതെന്ന് വെളിപ്പെടുത്തണം. എവിടെയാണ് അദ്ദേഹം പോകുന്നതെന്നും ആരൊക്കെയാണ് മുഖ്യമന്ത്രി കാണുന്നതെന്നുമെല്ലാം രഹസ്യമാണ്. അദ്ദേഹം എങ്ങോട്ടാണ് പോകുന്നതെന്ന് എംവി ഗോവിന്ദന് അറിയാമോ എന്നും അദ്ദേഹം ചോദിച്ചു.
കഴിഞ്ഞ ദിവസം അതീവ രഹസ്യമായാണ് പിണറായി വിജയൻ കുടുംബസമേതം ദുബായിലേക്ക് തിരിച്ചത്. ഇന്നലെ രാവിലെ കൊച്ചിയിൽ നിന്നായിരുന്നു ദുബായിലേക്ക് പോയത്. സ്വകാര്യ സന്ദർശനത്തിന്റെ ഭാഗമായാണ് ദുബായ് യാത്രയെന്നാണ് വിവരം. ഔദ്യോഗിക യാത്ര അല്ലാത്തതിനാൽ മുഖ്യമന്ത്രിയുടെ ഓഫീസിൽ നിന്നും ഔദ്യോഗിക അറിയിപ്പ് നൽകിയിട്ടില്ല.
എന്നാണ് മടക്കം എന്നതും മുഖ്യമന്ത്രിയുടെ ഓഫീസ് വ്യക്തമാക്കിയിട്ടില്ല. മറ്റ് ഏതെങ്കിലും രാജ്യങ്ങൾ മുഖ്യമന്ത്രി സന്ദർശിക്കുമോയെന്ന കാര്യത്തിൽ വ്യക്തതയില്ല. ഔദ്യോഗിക ആവശ്യത്തിനായി വിദേശത്തേക്ക് പോകുന്ന വേളകളിൽ സാധാരണ സർക്കാർ തന്നെ യാത്ര സംബന്ധിച്ച് പത്രക്കുറിപ്പ് ഇറക്കുകയാണ് പതിവ്. സ്വകാര്യസന്ദർശനമായതിനാൽ മുഖ്യമന്ത്രിയുടെ യാത്ര സംബന്ധിച്ച് ഔദ്യോഗിക അറിയിപ്പൊന്നും പുറത്തുവന്നിട്ടില്ല.
മന്ത്രി മുഹമ്മദ് റിയാസും ഭാര്യ വീണയും ദുബായിലേക്ക് പുറപ്പെട്ടിട്ടുണ്ട്. ദുബായ്ക്ക് പുറമെ ഇന്തോനേഷ്യയിലും സിംഗപ്പൂരിലും റിയാസും വീണയും സന്ദർശനം നടത്തും. 19 ദിവസത്തേക്കാണ് റിയാസിനു യാത്ര അനുമതി.
Discussion about this post