തിരുവനന്തപുരം: കരമനയിൽ യുവാവിനെ കല്ലുകൊണ്ട് തലയ്ക്കടിച്ച് കൊലപ്പെടുത്തിയ കേസിലെ പ്രതികളെ തിരിച്ചറിഞ്ഞു. കരമന സ്വദേശികളായ അഖിൽ, അനീഷ് , സുമേഷ്, വിനീഷ് രാജ് എന്നിവരെയാണ് തിരിച്ചറിഞ്ഞത്. ഇവർ കരമന അനന്തു കൊലക്കേസിലെ പ്രതികളാണെന്നും പോലീസിന് വ്യക്തമായിട്ടുണ്ട്. അതേസമയം സംഭവത്തിൽ പ്രതിയായ ഒരാളെ പോലീസ് കസ്റ്റഡിയിൽ എടുത്തു.
കൊലപാതകത്തിന് പിന്നാലെ ഇതിന്റെ സിസിടിവി ദൃശ്യങ്ങൾ പോലീസിന് ലഭിച്ചിരുന്നു. ഇതിൽ നിന്നാണ് പ്രതികളെക്കുറിച്ചുള്ള വിവരങ്ങൾ പോലീസിന് ലഭിച്ചത്. യുവാവിനെ അടിച്ച് നിലത്തിടുന്നതിന്റെയും ശേഷം കല്ലുകൊണ്ട് തല തകർക്കുന്നതിന്റെയും ദൃശ്യങ്ങൾ ആണ് പുറത്തുവന്നിരിക്കുന്നത്.
മരുതൂർ കടവ് പ്ലാവില വീട്ടിൽ അഖിലിനെയാണ് പ്രതികൾ ചേർന്ന് കൊലപ്പെടുത്തിയത്. ബാറിൽ ഉണ്ടായ തർക്കത്തിന്റെ തുടർച്ചയായിരുന്നു കൊലപാതകം. കാറിലെത്തിയ സംഘം ഇന്നലെ വൈകുന്നേരം അഖിലിനെ മർദ്ദിക്കുകയായിരുന്നു. ശേഷം കല്ലു കൊണ്ടും ഹോളോബ്രിക്‌സുകൊണ്ടും തലയ്ക്ക് അടിച്ചു. ആളുകൾ കൂടിയതോടെ ഇവിടെ നിന്നും സംഘം കടന്നു കളയുകയായിരുന്നു.
തലയോട്ടി പിളർന്ന നിലയിലാണ് അഖിലിനെ ആശുപത്രിയിൽ എത്തിച്ചത്. ഈ പരിക്കാണ് മരണകാരണമായത് എന്നാണ് പോസ്റ്റ്‌മോർട്ടം റിപ്പോർട്ട്. സംഭവത്തിന് പിന്നാലെ പ്രതികൾ കടന്നു കളയുകയായിരുന്നു.
അതേസമയം കുറ്റക്കാർക്കെതിരെ കർശന നടപടി സ്വീകരിക്കുമെന്ന് മന്ത്രി വി.ശിവൻകുട്ടി പറഞ്ഞു. അഖിലിന്റെ വീട് സന്ദർശിച്ച ശേഷം ആയിരുന്നു മന്ത്രിയുടെ പ്രതികരണം. അതി ദാരുണമായ സംഭവം ആണ് നടന്നത്. സർക്കാർ അതിയായ ഗൗരവത്തോടെയാണ് സംഭവത്തെ കാണുന്നത് എന്നും മന്ത്രി വ്യക്തമാക്കി.
Discussion about this post