എറണാകുളം: കനത്ത മഴയെ തുടർന്ന് വെള്ളത്തിനടിയിലായി കൊച്ചി നഗരം. മണിക്കൂറുകളോളം നിർത്താതെ പെയ്ത മഴയിൽ നഗരത്തിന്റെ പലഭാഗങ്ങളിലും രൂക്ഷമായ വെള്ളക്കെട്ട് രൂപപ്പെട്ടു. റോഡുകൾ വെള്ളത്തിനടിയിൽ ആയതിനെ തുടർന്ന് പല ഭാഗങ്ങളിലും ഗതാഗത തടസ്സം അനുഭവപ്പെട്ടു.
ഇടപ്പള്ളി, കുണ്ടന്നൂർ, കടവന്ത്ര, എം.ജി.റോഡ്,കാക്കനാട് ഇൻഫോ പാർക്ക് പരിസരം, കെ.എസ്.ആർ.ടിസി ബസ് സ്റ്റാന്റ് പരിസരം തുടങ്ങിയ ഭാഗങ്ങളിൽ ആണ് റോഡുകൾ വെള്ളത്തിനടിയിൽ ആയത്. കടവന്ത്ര ഗാന്ധി നഗറിൽ വീടുകൡ വെള്ളം കയറി. വൈകീട്ട് നാല് മണിയോടെയായിരുന്നു കൊച്ചിയിൽ മഴ ആരംഭിച്ചത്.
പതുക്കെ ആരംഭിച്ച മഴ പിന്നീട് ശക്തിപ്രാപിച്ചു. മഴയ്ക്ക് പുറമേ ശക്തമായ ഇടിയും മിന്നലും അനുഭവപ്പെട്ടിരുന്നു. രാത്രിയോടെ മഴ ശമിച്ചിട്ടുണ്ട്. ശക്തമായ മഴയുടെ സാഹചര്യത്തിൽ ജില്ലയിൽ റെഡ് അലർട്ടാണ്.
കൊച്ചിയ്ക്ക് പുറമേ തൃശ്ശൂർ ജില്ലയിലും ശക്തമായ മഴ തുടരുകയാണ്. നഗരത്തിലെ താഴ്ന്ന പ്രദേശങ്ങളിൽ വെള്ളം കയറി. അശ്വിനി ആശുപത്രിയ്ക്ക് സമീപമുള്ള വീടുകളിലും വെള്ളം കയറിയിട്ടുണ്ട്.
Discussion about this post