ന്യൂയോർക്ക്: വളർത്തുമൃഗങ്ങളെ മക്കളെപോലെ തന്നെ സ്നേഹിക്കുന്ന പലരുമുണ്ട് നമ്മുടെ ചുറ്റും. എവിടെ പോവുമ്പോളും അവരെ കൂടെ കൂട്ടുന്നവരാണ് ഇത്തരക്കാർ. കാറിലും ബൈക്കിലുമിരുത്തി നായ്ക്കളെ കൊണ്ടുപോകുന്നതെല്ലം നേരിട്ടും വീഡിയോകളിലൂടെയുമെല്ലാം കാണാറുണ്ട്. എന്നാൽ, വിദേശരാജ്യങ്ങളിൽ പോകുമ്പോൾ തങ്ങളുടെ അരുമകളായ നായ്ക്കളെ നാട്ടിൽ തന്നെ വിട്ടുപോകുകയാണ് പതിവ്. വിമാനത്തിൽ വളർത്തുമൃഗങ്ങളെ അനുവദിക്കാത്തത് തന്നെയാണ് ഇതിന് കാരണം. എന്നാൽ, ഈ പ്രതിസന്ധിക്ക് പരിഹാരവുമായി എത്തിയിരിക്കുകയാണ് ബാർക്ക് എയർ (BARK AIR ).
മനുഷ്യർക്കും നായ്ക്കൾക്കും ഒരുപോലെ സേവനം നൽകുന്ന എയർലൈൻ ആരംഭിച്ചുകൊണ്ടാണ് കമ്പനി ചരിത്രം കുറിച്ചിരിക്കുന്നത്. നായ്ക്കൾക്കുള്ള കളിപ്പാട്ട വിപണയിൽ പ്രമുഖരായ ബാർക്ക് ഒരു ചാർട്ടർ സേവനവുമായി സഹകരിച്ചുകൊണ്ടാണ് സുപ്രധാന നീക്കം നടത്തിയിരിക്കുന്നത്. ഇതോടെ എല്ലാ വലിപ്പത്തിലുള്ളതും ഇനത്തിലുള്ളതുമായ നായ്ക്കൾക്കും ഇനി വിമാനത്തിൽ പറക്കാം. അത്യാഡംബര യാത്രാനുഭവമാണ് കമ്പനി വാഗ്ദാനം ചെയ്യുന്നത്. ന്യൂയോർക്കിൽ നിന്നും ലോസ് ഏഞ്ചൽസിലേക്ക് ആദ്യ സർവീസ് പറന്നുയർന്നതായി ഇൻസ്റ്റഗ്രാമിലൂടെയാണ് കമ്പനി അറിയിച്ചത്.
‘30000 അടി ഇയരത്തിൽ നായ്ക്കൾ നിറഞ്ഞ ഒരഒ വിമാനമുണ്ട്’ എന്നായിരുന്നു ബാർക്ക് ഇൻസ്റ്റഗ്രാമിൽ കുറിച്ചത്. തങ്ങൾ നായ്ക്കളെ ഒരു ചരക്കായി അല്ല കണക്കാക്കുന്നത്. അവർ അർഹിക്കുന്ന യാത്രാനുഭവം നൽകുക എന്ന ലക്ഷ്യത്തോടെയാണ് തങ്ങൾ ഈ സംരംഭം ആരംഭിച്ചിരിക്കുന്നത്. ഈ സംരംഭത്തിൽ തങ്ങളുടെ ഉപയോക്താക്കളെല്ലാം സന്തുഷ്ടരാണെന്നും കമ്പനി കുറിച്ചു.
നായ്ക്കൾക്കായി പ്രത്യേകം രൂപകൽപ്പന ചെയ്ത ആദ്യത്തെ എയർലൈനാണ് ബാർക്ക് എയർ. നായ്ക്കൾക്കുള്ള ട്രീറ്റുകൾ, ഇയർമഫ്സ്, പാനീയങ്ങൾ എന്നിവയുൾപ്പെടുന്ന ‘വൈറ്റ് പാവ്’ സേവനവും എയർലൈൻ നൽകുന്നുണ്ട്.
നിലവിൽ ന്യൂയോർക്ക് – ലോസ്എയ്ഞ്ചൽ സർവീസ്, ന്യൂയോർക്ക് – ലണ്ടൻ സർവീസ് എന്നീ സർവീസുകളാണ് ലഭ്യമാകുന്നത്. ഓരോ സർവീസിലും 15 നായ്ക്കൾക്കും ഉടമകൾക്കും യാത്ര ചെയ്യാം. ആഭ്യന്തര യാത്രയ്ക്ക് ഏകദേശം 6000 ഡോളറും രാജ്യാന്തര യാത്രകൾക്ക് 8000 ഡോളറുമാണ് ടിക്കറ്റ് നിരക്ക്. ഡിമാൻഡ് അനുസരിച്ച് ടിക്കറ്റ് നിരക്കിൽ മാറ്റം കൊണ്ടുവരുമെന്ന് കമ്പനി അറിയിച്ചിട്ടുണ്ട്.
