ടെഹ്റാൻ : ഇറാൻ പിന്തുണയോടെ പ്രവർത്തിക്കുന്ന തീവ്രവാദ സംഘടനയായ ഹിസ്ബുള്ള ഇസ്രായേലിന് നേരെ ആക്രമണങ്ങൾ നടത്തിയതായി റിപ്പോർട്ട്. ലെബനൻ പ്രദേശത്ത് നിന്ന് ഇസ്രായേലിനെതിരെ ഹിസ്ബുള്ള തുടർച്ചയായ ആക്രമണങ്ങൾ നടത്തിയതായി റോയിട്ടേഴ്സ് അടക്കമുള്ള അന്താരാഷ്ട്ര മാദ്ധ്യമങ്ങളാണ് റിപ്പോർട്ട് ചെയ്തത് .
ഇസ്രായേലിനെതിരായ ആക്രമണത്തിനായി ഹിസ്ബുള്ള ഇറാൻ നിർമ്മിത ഫലഖ്-2 റോക്കറ്റുകൾ ആണ് ഉപയോഗിച്ചത്. വടക്കൻ ഇസ്രായേലിലെ ബെയ്റ്റ് ഹില്ലെലിലുള്ള ഐഡിഎഫ് കമാൻഡ് സെൻ്ററിന് നേരെയാണ് ഹിസ്ബുള്ള ഫലഖ്-2 റോക്കറ്റുകൾ വിക്ഷേപിച്ചത്. ആദ്യമായാണ് ഹിസ്ബുള്ള ഇറാൻ നിർമ്മിത ഫലഖ്-2 റോക്കറ്റുകൾ ഉപയോഗിച്ച് ആക്രമണം നടത്തുന്നത്.
ലെബനനിലെ ഹിസ്ബുള്ള കേന്ദ്രങ്ങളിലേക്ക് ഇസ്രായേൽ പ്രതിരോധ സേന നടത്തിയ ആക്രമണങ്ങൾക്കുള്ള പ്രതികാരമായാണ് ഇസ്രായേലിനെതിരെ ആക്രമണം നടത്തിയത് എന്നാണ് ഹിസ്ബുള്ള വ്യക്തമാക്കുന്നത്. സംഭവത്തിൽ രണ്ട് പേർ കൊല്ലപ്പെട്ടതായി റിപ്പോർട്ടുകൾ സൂചിപ്പിക്കുന്നു. തെക്കൻ ലെബനനിലെ ഐതറൂണിന് സമീപം ഒരു ഹിസ്ബുള്ള പ്രവർത്തകനെ തങ്ങളുടെ സൈനികർ കണ്ടെത്തിയതായും ഐഡിഎഫ് അറിയിച്ചു.
