കോട്ടയം : നൈറ്റ് ഡ്യൂട്ടി കഴിഞ്ഞ് വീട്ടിലേക്ക് മടങ്ങിയ ഗ്രേഡ് എസ് ഐ യെ കാണാനില്ലെന്ന് പരാതി. കോട്ടയം വെസ്റ്റ് പോലീസ് സ്റ്റേഷനിലെ ഗ്രേഡ് എസ് ഐ അയർക്കുന്നം നീറിക്കാട് കീഴാട്ട് കാലായിൽ കെ രാജേഷിനെയാണ് കാണാതായതായി പരാതി ഉയർന്നിട്ടുള്ളത്. സംഭവത്തിൽ രാജേഷിന്റെ ബന്ധുക്കൾ അയർക്കുന്നം പോലീസിൽ പരാതി നൽകി.
ജൂൺ 14ന് രാത്രി നൈറ്റ് ഡ്യൂട്ടി നിർവഹിച്ച ശേഷം വീട്ടിലേക്ക് മടങ്ങിയതായിരുന്നു രാജേഷ്. എന്നാൽ ശനിയാഴ്ച രാത്രിയായിട്ടും ഇദ്ദേഹം വീട്ടിൽ തിരിച്ചെത്താതെ ആയതിനെ തുടർന്നാണ് ബന്ധുക്കൾ പോലീസിൽ പരാതി നൽകുന്നത്. മൊബൈൽ ഫോണിൽ ബന്ധപ്പെടുമ്പോൾ സ്വിച്ച് ഓഫ് എന്ന മറുപടി ലഭിക്കുന്നതായും ബന്ധുക്കൾ പരാതിയിൽ സൂചിപ്പിച്ചു.
അച്ചടക്ക നടപടികളുടെ ഭാഗമായി ഗ്രേഡ് എസ് ഐ രാജേഷിന് നേരത്തെ മെമ്മോ നൽകിയിരുന്നതായി പോലീസ് അറിയിച്ചു. ഇതേ തുടർന്ന് രാജേഷ് മാനസിക സമ്മർദ്ദം അനുഭവിച്ചിരുന്നതായും ബന്ധുക്കൾ നൽകിയ പരാതിയിൽ സൂചിപ്പിക്കുന്നുണ്ട്.
