കണ്ണൂർ: തലശ്ശേരിയിൽ ബോംബ് പൊട്ടിത്തെറിച്ച് വയോധികൻ മരിച്ചു. തലശ്ശേരി എരഞ്ഞോളി സ്വദേശി വേലായുധൻ (85) ആണ് മരിച്ചത്. ഉച്ചയോടെയായിരുന്നു സംഭവം.
ആൾത്താമസമില്ലാത്ത വീടിന് സമീപമുള്ള പറമ്പിൽ തേങ്ങ പെറുക്കാൻ പോയതായിരുന്നു വേലായുധൻ. ഇതിനിടെ പറമ്പിൽ നിന്നും കിട്ടിയ സ്റ്റീൽ പാത്രം പോലുള്ള വസ്തു വേലായുധന് ലഭിച്ചിരുന്നു. ഇത് തുറക്കാൻ ശ്രമിക്കുന്നതിനിടെ പൊട്ടിത്തെറിയ്ക്കുകയായിരുന്നു.
സംഭവത്തിൽ അദ്ദേഹത്തിന് സാരമായി പരിക്കേറ്റിരുന്നു. ആശുപത്രിയിൽ എത്തിച്ച് ചികിത്സ നൽകുന്നതിനിടെ ആയിരുന്നു മരണം. എരഞ്ഞോളി ഗ്രാമ പഞ്ചായത്തിന് സമീപം ആണ് വേലായുധന്റെ വീട്. അദ്ദേഹത്തിന്റെ മൃതദേഹം തലശ്ശേരി ജനറൽ ആശുപത്രിയിൽ സൂക്ഷിച്ചിരിക്കുകയാണ്. പോസ്റ്റ്മോർട്ടത്തിന് ശേഷം മൃതദേഹം ബന്ധുക്കൾക്ക് കൈമാറും.
ബോംബ് സൂക്ഷിച്ചിരുന്ന സ്ഥലമാണ് ഇതെന്നാണ് പോലീസ് പറയുന്നത്. സംഭവത്തിൽ വിശദമായ അന്വേഷണം ആരംഭിച്ചു.
