ന്യൂഡൽഹി: നീറ്റ്, യുജിസി നെറ്റ് ചോദ്യപേപ്പറുകൾ ചോർന്നുവെന്ന വാർത്തകൾക്ക് പിന്നാലെ, പരീക്ഷകളുടെ നടത്തിപ്പിൽ സുതാര്യത ഉറപ്പ് വരുത്തുന്നതിനും ക്രമക്കേടുകൾ ഒഴിവാക്കുന്നതിനുമായി ഉന്നതതല സമിതിയെ നിയോഗിച്ച് കേന്ദ്ര സർക്കാർ. പരീക്ഷാ നടത്തിപ്പിൽ ആവശ്യമായ പരിഷ്കരണങ്ങൾ, സുരക്ഷാ ക്രമീകരണങ്ങളിലെ വിട്ടുവീഴ്ചയില്ലായ്മ, എൻടിഎയുടെ സുതാര്യമായ പ്രവർത്തനം എന്നിവയിൽ സമിതിയുടെ ഇടപെടൽ ഉണ്ടാകും.
നിലവിലെ വിവാദ വിഷയങ്ങളിൽ രണ്ട് മാസത്തിനുള്ളിൽ റിപ്പോർട്ട് സമർപ്പിക്കാനാണ് കേന്ദ്രസർക്കാർ സമിതിയോട് ആവശ്യപ്പെട്ടിരിക്കുന്നത്. മുൻ ഐ എസ് ആർ ഒ ചെയർമാൻ ഡോക്ടർ കെ രാധാകൃഷ്ണൻ ആയിരിക്കും സമിതിയെ നയിക്കുന്നത്. ഡോക്ടർ രൺദീപ് ഗുലേറിയ, പ്രൊഫസർ ബി ജെ റാവു, പ്രൊഫസർ രാമമൂർത്തി കെ, പങ്കജ് ബൻസാൽ, ആദിത്യ മിത്തൽ, ഗോവിന്ദ് ജയ്സ്വാൾ തുടങ്ങിയവരും സമിതിയിൽ അംഗങ്ങളാണ്.
പരീക്ഷാ നടത്തിപ്പിൽ ആദ്യാവസാനം സമിതിയുടെ മേൽനോട്ടമുണ്ടാകുമെന്ന് കേന്ദ്ര വിദ്യാഭ്യാസ വകുപ്പ് മന്ത്രി ധർമേന്ദ്ര പ്രധാൻ അറിയിച്ചു. നിലവിലെ വിവാദ വിഷയങ്ങളിൽ കുറ്റക്കാരെന്ന് കണ്ടെത്തുന്ന ഉദ്യോഗസ്ഥർ ആരായിരുന്നാലും അവർക്കെതിരെ മുഖം നോക്കാതെ കർശന നടപടി ഉറപ്പായിരിക്കുമെന്നും അദ്ദേഹം ആവർത്തിച്ചു. വിഷയം രാഷ്ട്രീയവത്കരിക്കുന്ന പ്രതിപക്ഷത്തിന്റെ നടപടി അപക്വവും പരിഹാസ്യവുമാണെന്നും അദ്ദേഹം വ്യക്തമാക്കി.
