കിണറില്ലാത്ത വീടുകൾ നാട്ടിൻപുറങ്ങളിൽ കുറവായിരിക്കും. ഭൂമി കുഴിച്ച് നീരുറവയ്ക്ക് ചുറ്റും നല്ല ചെങ്കല്ല് കൊണ്ടോ കോൺക്രീറ്റ് വളയങ്ങൾ കൊണ്ടോ കെട്ടിയുണ്ടാക്കിയ നിറയെ വെള്ളമുള്ള കിണറുകൾ വീടിനരികെ ഉള്ളത് വലിയ ആശ്വാസം തന്നെയാണ്. എന്നാൽ ഇങ്ങനെ ഉണ്ടാക്കി വെള്ളം ഊറ്റിയെടുത്താൽ മാത്രം മതിയോ. പോരാ.. കിണർ കാലങ്ങളോളം നിലനിൽക്കാനും നല്ല ശുദ്ധമായ ജലം ലഭിക്കാനും ഇടയ്ക്കിടെ വൃത്തിയാക്കണം. അപകടം പിടിച്ച പണി തന്നെയാണ് ഇതിനെന്ന് സംശയമേയില്ല.വേനൽക്കാലമാണ് കിണർ വൃത്തിയാക്കാൻ ഏറ്റവും സുരക്ഷിതം.
കിണർ വൃത്തിയാക്കാൻ ഇറങ്ങുന്നവർ ശ്വാസം കിട്ടാതെ അപകടത്തിൽപ്പെടുന്ന സംഭവങ്ങൾ നിരന്തരം റിപ്പോർട്ട് ചെയ്യപ്പെടാറുണ്ട്. അതുകൊണ്ട് തന്നെ വിദഗ്ധർ അല്ലാത്ത ആരും കിണറ്റിലറങ്ങാനുള്ള സാഹസം കാണിക്കരുതെന്ന് സാരം. മുൻകരുതലുകൾ ഇല്ലാതെ കിണറ്റിൽ ഇറങ്ങുന്നത് അപകടത്തിനിടയാക്കും. ആഴം കുറവുള്ള കിണറാണെങ്കിലും ഓക്സിജന്റെ സാന്നിധ്യമില്ലാത്തവയാവും ഏറെയും. ഇറങ്ങുന്നതിനു മുൻപു കിണറ്റിൽ വായുസഞ്ചാരമുണ്ടോയെന്നു പരിശോധന നടത്തി ഉറപ്പാക്കണം. കിണറ്റിൽ വായുസഞ്ചാരമുണ്ടെങ്കിലും കാർബൺ മോണോക്സൈഡ് പോലെയുള്ള വിഷവാതകത്തിന്റെ സാന്നിധ്യവും അപകടം വരുത്തിവയ്ക്കുമെന്ന് വിദഗ്ധർ മുന്നറിയിപ്പു നൽകുന്നു.
കാർബൺ മോണോക്സൈഡ് വാതകത്തിന്റെ സാന്നിധ്യം മുൻകൂട്ടി അറിയാൻ താരതമ്യേന ബുദ്ധിമുട്ടുണ്ട്. വെള്ളത്തിൽ പൊങ്ങിക്കിടക്കുന്ന തരം മോട്ടോറുകൾ ഉപയോഗിക്കുന്ന കിണറുകളിൽ കാർബൺ മോണോക്സൈഡിന്റെ സാന്നിധ്യത്തിനു സാധ്യതയേറെയുണ്ടെന്നാണ് വിദഗ്ധരുടെ അഭിപ്രായം. ഇത്തരം കിണറുകളിൽ പ്രത്യേക സുരക്ഷാ സംവിധാനങ്ങൾ ഒരുക്കാതെ ഇറങ്ങരുതെന്നും മുന്നറിയിപ്പ് നൽകുന്നുണ്ട്. കാർബൺ മോണോക്സൈഡ് ശ്വസിക്കുന്നതോടെ കിണറ്റിൽ കുഴഞ്ഞു വീഴുന്നവരെ നിശ്ചിത സമയത്തിനുള്ളിൽ പുറത്തെത്തിച്ച് ചികിത്സ നൽകിയില്ലെങ്കിൽ മരണം വരെ സംഭവിക്കാം
നിരന്തരം ഉപയോഗിക്കുന്ന കിണറാണെങ്കിലും ആറ് മാസം കൂടുമ്പോൾ ബ്ലീച്ചിങ് പൗഡർ ഉപയോഗിച്ചു വൃത്തിയാക്കുന്നതു നല്ലതാണ്. മഴക്കാലം തീരാറാകുമ്പോഴും വേനൽക്കാലത്തിന്റെ ആരംഭത്തിലും കിണർ വൃത്തിയാക്കാം. കിണർ വൃത്തിയാക്കിയ ശേഷം വെള്ളം ഉപയോഗിക്കുന്നതിനു മുമ്പ് കുറച്ച് സാമ്പിളെടുത്ത് ഒരു ലാബറട്ടറിയിൽ പരിശോധനയ്ക്കു നൽകുന്നത് നല്ലതാണ്
ആദ്യം കിണറിൽ ഉള്ള വെള്ളം മുഴുവൻ വറ്റിക്കണം. തുടർന്ന് കിണറിനകത്തുള്ള ഇലകൾ, ചെളി തുടങ്ങിയ മാലിന്യങ്ങളെല്ലാം കളഞ്ഞ്, വൃത്തിയാക്കണം. അപ്പോഴെയ്ക്കും കിണറിൽ പുതിയ വെള്ളം ഊറിവന്നിട്ടുണ്ടാകും. ഈ വെള്ളം ശുദ്ധീകരിച്ച ശേഷം മാത്രമേ ഉപയോഗിക്കാവൂ. ബ്ലീച്ചിങ് പൗഡർ ഉപയോഗിച്ച് ശുദ്ധീകരിക്കാം. 1000 ലിറ്റർ വെള്ളത്തിൽ 2.5 ഗ്രാം മുതൽ 5 ഗ്രാം വരെ ബ്ലീച്ചിങ് പൗഡർ ലയിപ്പിക്കുക. ഇത് അര മണിക്കൂറെങ്കിലും അനക്കാതെ വയ്ക്കണം. അതു കഴിഞ്ഞ് കാണുന്ന തെളിഞ്ഞ വെള്ളം മാത്രമെടുത്ത് കിണറിലേക്ക് ഒഴിക്കാം. തുടർന്ന് തൊട്ടി കിണറിനകത്ത് ഇട്ട് വെള്ളം ഇളക്കുക. ഈ പ്രക്രിയ എല്ലാം കഴിഞ്ഞ് ചുരുങ്ങിയത് 12 മണിക്കൂർ കഴിഞ്ഞു മാത്രമെ വെള്ളം വീട്ടാവശ്യത്തിനായി എടുക്കാവൂ.
കിണർ വൃത്തിയാക്കിയ ശേഷം ചിരട്ട കത്തിച്ച് വെള്ളത്തിലേക്ക് ഇടുന്നത് പണ്ടുകാലം മുതൽ ഉള്ള പതിവാണ്. ഇലകളും മറ്റും വീണ് ചില കിണറുകളിലെ വെള്ളത്തിനു നിറമുണ്ടാകും. ഈ നിറത്തെ ആഗിരണം ചെയ്യാനുള്ള കഴിവ് ചിരട്ട കരിക്ക് ഉണ്ട്. ചുണ്ണാമ്പ് കലക്കിയോ കിഴി കെട്ടിയോ ഇടുന്ന രീതിയും ഉണ്ട്. ചില വെള്ളത്തിന് അമ്ലത്വഘടകങ്ങൾ കൂടുതലുണ്ടാകും. ഇതു കാരണം വെള്ളത്തിന് പുളി രസവും അനുഭവപ്പെടാം. ഈ അമ്ലത്വ ഘടകത്തെ നിർവീര്യമാക്കാനാണ് ചുണ്ണാമ്പ് ഉപയോഗിക്കുന്നത്.
Discussion about this post