തിരുവനന്തപുരം : ദീർഘദൂര സർവീസുകൾ നടത്തുന്ന ബസുകൾ രാത്രികളിൽ യാത്രക്കാർ പറയുന്ന സ്ഥലങ്ങളിൽ നിർത്താനാവില്ലെന്ന് കെഎസ്ആർടിസി. മനുഷ്യാവകാശ കമ്മീഷനെയാണ് കെഎസ്ആർടിസി ഇക്കാര്യം അറിയിച്ചിട്ടുള്ളത്. രാത്രി 8 മുതൽ രാവിലെ 6 വരെ സ്ത്രീകളും മുതിർന്ന പൗരൻമാരും ഭിന്നശേഷിക്കാരും ആവശ്യപ്പെടുന്ന സ്ഥലങ്ങളിൽ ബസ് നിർത്തണമെന്ന് നേരത്തെ ഗതാഗത മന്ത്രി സർക്കുലർ പുറത്തിറക്കിയിരുന്നു. എന്നാൽ ദീർഘദൂര മൾട്ടി ആക്സിൽ എ.സി സൂപ്പർ ഡീലക്സ്, സൂപ്പർ എക്സ്പ്രസ് ബസുകളിൽ ഈ നിർദ്ദേശം നടപ്പാക്കുന്നത് പ്രായോഗികമായി ബുദ്ധിമുട്ടാണെന്ന് കെഎസ്ആർടിസി മാനേജിംഗ് ഡയറക്ടർ വ്യക്തമാക്കി.
മുൻകൂട്ടി നിശ്ചയിക്കാത്ത സ്ഥലങ്ങളിൽ ബസ് നിർത്തുന്നത് ദീർഘദൂര യാത്രക്കാർക്ക് ബുദ്ധിമുട്ടുണ്ടാക്കുന്നു എന്നാണ് കെഎസ്ആർടിസിയുടെ വാദം. ഇത്തരത്തിൽ ഭിന്നശേഷിക്കാർക്കും മറ്റുമായി രാത്രി യാത്രയിൽ ബസ് നിർത്തി കൊടുക്കുന്നതിനെതിരെ മറ്റു യാത്രക്കാർ പരാതിപ്പെടുന്നതായും കെഎസ്ആർടിസി അറിയിക്കുന്നു.
പാലക്കാട് –വാളയാർ റൂട്ടിൽ പതിനാലാംകല്ലിൽ ബസുകൾ നിർത്താറില്ലെന്ന് പരാതിപ്പെട്ട് സമർപ്പിച്ച പരാതിയിൽ കമ്മീഷൻ ആക്റ്റിങ് ചെയർപേഴ്സണും ജൂഡീഷ്യൽ അംഗവുമായ കെ. ബൈജൂനാഥ് ആവശ്യപ്പെട്ട റിപ്പോർട്ടിലാണ് മനുഷ്യാവകാശ കമ്മീഷൻ കെഎസ്ആർടിസിയുടെ വിശദീകരണം തേടിയിരുന്നത്. മറുപടി ലഭിച്ചതിനെ തുടർന്ന് വാളയാർ-പാലക്കാട് റൂട്ടിൽ രാത്രികാലങ്ങളിൽ ഓർഡിനറി ബസ് സർവ്വീസുകൾ ഏർപ്പെടുത്താനുള്ള സാധ്യത പരിശോധിക്കണമെന്ന് മനുഷ്യാവകാശ കമ്മീഷൻ കെഎസ്ആർടിസിയോട് ആവശ്യപ്പെട്ടിട്ടുണ്ട്.
