മലപ്പുറം : ബ്രിട്ടീഷ് കാലഘട്ടത്തിലെ ക്രിമിനൽ നിയമങ്ങൾക്ക് അവസാനമിട്ട് ഇന്നുമുതൽ രാജ്യത്ത് ഇന്ത്യയുടെ സ്വന്തം ഇന്ത്യൻ ശിക്ഷാനിയമങ്ങൾ നടപ്പിലാക്കി തുടങ്ങി. ഭാരതീയ ന്യായ സംഹിത എന്ന പുതിയ ഇന്ത്യൻ ശിക്ഷാനിയമപ്രകാരമുള്ള ആദ്യ കേസ് രജിസ്റ്റർ ചെയ്തത് രാജ്യ തലസ്ഥാനമായ ഡൽഹിയിലാണ്. വൈകാതെ തന്നെ കേരളത്തിലും ഭാരതീയ ന്യായ സംഹിത പ്രകാരമുള്ള ആദ്യത്തെ കേസ് രജിസ്റ്റർ ചെയ്തു.
കേരളത്തിൽ മലപ്പുറത്താണ് ഭാരതീയ ന്യായ സംഹിത പ്രകാരമുള്ള ആദ്യ കേസ് രജിസ്റ്റർ ചെയ്തിട്ടുള്ളത്. ക്രൈം നമ്പർ 936 പ്രകാരം കേസ് രജിസ്റ്റർ ചെയ്തിരിക്കുന്നത് കർണാടക സ്വദേശിയായ യുവാവിനെതിരെയാണ്. തിങ്കളാഴ്ച രാവിലെ ആണ് കേരളത്തിലെ ആദ്യ ബിഎൻഎസ് കേസ് രജിസ്റ്റർ ചെയ്തിട്ടുള്ളത്.
ഇരുചക്ര വാഹനത്തിൽ ഹെൽമെറ്റ് ഇല്ലാതെ യാത്ര ചെയ്തു എന്നുള്ളതാണ് കേരളത്തിൽ രജിസ്റ്റർ ചെയ്തിട്ടുള്ള ആദ്യ കേസ്. പാലക്കാട് നിന്നും കോഴിക്കോട്ടേക്ക് പോവുകയായിരുന്നു യുവാവിനെ മലപ്പുറം കൊളത്തൂരിൽ വെച്ചാണ് പോലീസ് പിടികൂടിയിരുന്നത്. ഹെൽമറ്റ് ധരിക്കാതെ ആശ്രദ്ധമായി വാഹനം ഓടിച്ചതിന് കേസ് രജിസ്റ്റർ ചെയ്ത ശേഷം പ്രതിക്ക് നോട്ടീസ് നൽകി വിട്ടയച്ചതായാണ് വിവരം.
