കോട്ടയം : റംബൂട്ടാൻ കുരു തൊണ്ടയിൽ കുടുങ്ങിയതിനെ തുടർന്ന് കുഞ്ഞ് മരിച്ചു. 8 മാസം മാത്രം പ്രായമുള്ള കുഞ്ഞാണ് മരിച്ചത്. ഞായറാഴ്ച വൈകിട്ട് ഏഴു മണിയോടെ ആയിരുന്നു സംഭവം നടന്നത്. പാലാ മീനച്ചിൽ സ്വദേശികളായ സുനിൽ ലാലിന്റേയും ശാലിനിയുടേയും മകൻ ബദരീനാഥാണ് മരിച്ചത്.
വീട്ടുകാർ കുഞ്ഞിന് റംബൂട്ടാൻ പഴം പൊളിച്ച് നൽകുന്നതിനിടയിലാണ് സംഭവം നടന്നത്. കഴിക്കുന്നതിനിടെ കുഞ്ഞ് കുരു വിഴുങ്ങുകയും തൊണ്ടയിൽ കുടുങ്ങുകയുമായിരുന്നു. ശ്വാസതടസം അനുഭവപ്പെട്ടതിനെ തുടർന്ന് ഉടൻ തന്നെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.
പോഷകങ്ങൾ ധാരാളമായി അടങ്ങിയിട്ടുണ്ടെങ്കിലും കുഞ്ഞുങ്ങൾക്ക് എറെ കരുതലോടെ നൽകേണ്ട പഴമാണ് റംബൂട്ടാൻ. അല്പം മുതിർന്ന കുട്ടികൾക്ക് പോലും പഴം മുഴുവനോടെ നൽകുകയോ അധികമായി നൽകുകയോ ചെയ്യരുതെന്നാണ് ആരോഗ്യ വിദഗ്ധരുടെ ഉപദേശം. റംബുട്ടാൻ ഉപയോഗം കുട്ടികൾക്കുള്ള പരിധിയിൽ കൂടുതൽ ആവുന്നത് ആസിഡ് റിഫ്ലക്സ്, വയറ്റിലെ അൾസർ, മലബന്ധം തുടങ്ങിയ ഗ്യാസ്ട്രോഇൻ്റസ്റ്റൈനൽ, ദഹനസംബന്ധമായ പ്രശ്നങ്ങളിലേക്കും നയിക്കുന്നതാണ്.
Discussion about this post