നമ്മുടെ ദൈനംദിന ജീവിതം കൂടുതൽ എളുപ്പമാക്കാൻ സ്മാർട് ഫോണുകളുടെ വരവ് കൊണ്ട് കഴിഞ്ഞിട്ടുണ്ട്. അതുകൊണ്ട് തന്നെ ഇന്ന് കൊച്ച് കുട്ടികൾ മുതൽ പ്രായമായവർ വരെ സ്മാർട് ഫോണുകളുടെ ഉപയോക്താക്കൾ ആണ്. എന്നാൽ വളരെ സഹായകമായ ഈ സ്മാർട് ഫോണുകളെ ആരോഗ്യവുമായി ബന്ധപ്പെടുത്തി അധികം ശുഭകരമായ കാര്യങ്ങൾ അല്ല നാം കേൾക്കാറുള്ളത്. ഫോണുകളുടെ നിരന്തര ഉപയോഗം നമ്മുടെ ആരോഗ്യത്തെ ദോഷകരമായി ബാധിക്കുന്നുവെന്നാണ് പറയുന്നത്. പല പഠനങ്ങളിലും ഇക്കാര്യം വ്യക്തമായിട്ടും ഉണ്ട്. സ്മാർട് ഫോണുകളിൽ കൂടുതലായി സമയം ചിലവാക്കുന്നത് അഡിക്ഷൻ മുതൽ മാനസിക സമ്മർദ്ദം വരെ ഉണ്ടാക്കിയേക്കാം.
അടുത്തിടെയായി സ്മാർട് ഫോണുമായി ബന്ധപ്പെട്ട് കേൾക്കുന്നതാണ് ഒന്നാണ് തലച്ചോറിലെ ക്യാൻസറിനെ പറ്റിയുള്ള ചില കാര്യങ്ങൾ. ഫോണിന്റെ നിരന്തര ഉപയോഗം തലച്ചോറിൽ ക്യാൻസർ ഉണ്ടാക്കും എന്നാണ് പ്രചാരണം. ഫോണുകളിൽ നിന്നുള്ള റേഡിയേഷൻ തലച്ചോറിൽ ക്യാൻസർ വളർത്തുമേ്രത. ഇതുമായി ബന്ധപ്പെട്ട് ഗവേഷകർ എന്താണ് പറയുന്നത് എന്ന് നോക്കാം.
സ്മാർട് ഫോണുകൾ ഉപയോഗിക്കുന്ന എല്ലാവർക്കും തലച്ചോറിൽ ക്യാൻസർ ഉണ്ടാകുമെന്ന് ഒരു പഠനവും കണ്ടെത്തിയിട്ടില്ല. പക്ഷെ. പല പഠനങ്ങളിലും ഇതിനുള്ള സൂചനകൾ ലഭിച്ചിട്ടുണ്ട്. എന്തിരുന്നാലും ഇതുമായി ബന്ധപ്പെട്ട് വിശദമായ പഠനം ആവശ്യമുണ്ടെന്നും ഇവർ പറയുന്നു. മൊബൈൽ ഫോണുകളിൽ നിന്നും പ്രവഹിക്കുന്ന റേഡിയേഷനിൽ ക്യാൻസറിന് കാരണമായ ഘടകങ്ങൾ അടങ്ങിയിട്ടുണ്ടെന്നാണ് പല പഠനങ്ങളിലെയും കണ്ടെത്തൽ.
ഇനി എങ്ങനെ നമുക്ക് മൊബൈൽ ഫോണുകൾ സുരക്ഷിതമായി ഉപയോഗിക്കാമെന്ന് നോക്കാം. മൊബൈൽ ഫോണുകൾ ഉപയോഗിക്കുന്നതിന് നിയന്ത്രണം ഏർപ്പെടുത്തുകയാണ് ആദ്യ വഴി. അതായത് മൊബൈൽ ഫോൺ ഉപയോഗിക്കാൻ നിശ്ചിത സമയം മാത്രം മാറ്റിവയ്ക്കുക. മൊബൈലിൽ ദീർഘനേരം സംസാരിക്കേണ്ട സാഹചര്യം ഉള്ളപ്പോൾ സ്പീക്കറിൽ ഇടുകയോ ഹെഡ്‌സെറ്റ് പോലുള്ള ഉപകരണങ്ങൾ ഉപയോഗിക്കുകയോ ചെയ്യാം. ഫോൺ ചെയ്യുന്നതിന് പകരം സന്ദേശങ്ങൾ അയക്കാം. ഉറങ്ങുമ്പോൾ അകലത്തിൽ വേണം ഫോണുകൾ വയ്ക്കാൻ. ഉപയോഗിക്കാതിരിക്കുമ്പോൾ വൈ ഫൈ, ബ്ലൂടൂത്ത് എന്നിവ ഓഫ് ആക്കിയിടാം.
