റായ്പൂര്: ക്ലാസ്മുറിയിലിരുന്ന് പെണ്കുട്ടികള് സംഘം ചേര്ന്ന് മദ്യപിച്ച സംഭവത്തില് അന്വേഷണത്തിന് ഉത്തരവിട്ട് സംസ്ഥാന വിദ്യാഭ്യാസ വകുപ്പ്. സംഭവത്തിന്റെ ദൃശ്യങ്ങള് സമൂഹമാദ്ധ്യമങ്ങളില് വൈറലായതിന് പിന്നാലെയാണ് നടപടി.
ഛത്തീസ്ഗഡിലെ ബിലാസ്പൂര് ജില്ലയിലെ ഭട്ചാര ഗ്രാമത്തിലെ സര്ക്കാര് ഹയര് സെക്കന്ഡറി സ്കൂളിലാണ് സംഭവം. ഈ വര്ഷം ജൂലായ് മാസത്തിലാണ് പെണ്കുട്ടികള് മദ്യപിച്ചത്. വീഡിയോ ദൃശ്യങ്ങള് വിദ്യാഭ്യാസ വകുപ്പിലെ ഉന്നത ഉദ്യോഗസ്ഥര് പരിശോധിച്ചപ്പോഴാണ് ജൂലായിലാണ് ഇത് ചിത്രീകരിച്ചിരിക്കുന്നതെന്ന് മനസ്സിലാക്കിയത്.
ബിയറും ശീതളപാനീയങ്ങളുമാണ് പെണ്കുട്ടികള് ക്ലാസ്മുറിയില് വച്ച് കഴിച്ചത്. ദൃശ്യങ്ങളുടെ ആധികാരികത സ്ഥിരീകരിച്ചതായി ജില്ലാ വിദ്യാഭ്യാസ ഓഫീസര് ടി.ആര് സാഹു പ്രതികരിച്ചു. സംഭവത്തെക്കുറിച്ച് അന്വേഷിക്കാന് മൂന്നംഗ കമ്മിറ്റി രൂപീകരിച്ചിട്ടുണ്ട്. അന്വേഷണസംഘം വിദ്യാര്ത്ഥികളുടെയും അദ്ധ്യാപകരുടെയും മൊഴി രേഖപ്പെടുത്തിയതായും അദ്ദേഹം പറഞ്ഞു.
