വന്‍കുടലിനെയും മലാശയത്തെയും ബാധിക്കുന്ന ഗുരുതര ആരോഗ്യ പ്രശ്നമാണ് വന്‍കുടല്‍ ക്യാന്‍സര്‍ അഥവാ കൊളോറെക്ടല്‍ ക്യാന്‍സര്‍. വൻകുടൽ കാൻസർ സാധാരണയായി പ്രായമായവരെയാണ് കൂടുതലായി ബാധിക്കുന്നത്. എന്നിരുന്നാലും ഏത് പ്രായത്തിലും ഇത് സംഭവിക്കാം. വൻകുടലിനുള്ളിൽ രൂപം കൊള്ളുന്ന പോളിപ്സ് എന്നറിയപ്പെടുന്ന കോശങ്ങളുടെ ചെറിയ കൂട്ടങ്ങളായാണ് ഇത് സാധാരണയായി ആരംഭിക്കുന്നത്. പോളിപ്‌സുകൾ സാധാരണയായി അർബുദമല്ല എന്നാൽ ചിലത് കാലക്രമേണ വൻകുടൽ കാൻസറായി മാറുന്നതാണ്.
അന്താരാഷ്ട്ര തലത്തിൽ ക്യാൻസർ മരണങ്ങളുടെ പ്രധാന കാരണങ്ങളിലൊന്നാണ് വന്‍കുടല്‍ ക്യാന്‍സര്‍. പലർക്കും ആദ്യം ലക്ഷണങ്ങൾ കാണില്ല എന്നുള്ളത് ഈ രോഗത്തിന്റെ ഒരു പ്രത്യേകതയാണ്. ക്യാൻസറിൻ്റെ വലുപ്പത്തെയും സ്ഥാനത്തെയും ആശ്രയിച്ചായിരിക്കും രോഗലക്ഷണങ്ങൾ പ്രത്യക്ഷപ്പെടുന്നത്. പതിവായി വയറിളക്കം അല്ലെങ്കിൽ മലബന്ധം എന്നിവ ഉണ്ടാകുന്നതാണ് ഒരു പ്രധാന ലക്ഷണം. മലാശയ രക്തസ്രാവം അല്ലെങ്കിൽ മലത്തിൽ രക്തം കാണപ്പെടുന്നതും ഒരു പ്രധാന ലക്ഷണമാണ്.
വയറിലെ അസ്വസ്ഥത, അടിവയറ്റിലെ മലബന്ധം, വേദന
പെട്ടെന്നുള്ള ശരീരഭാരം കുറയല്‍, ബലഹീനത അല്ലെങ്കില്‍ ക്ഷീണം,
കുടല്‍ പൂര്‍ണ്ണമായും ശൂന്യമാകുന്നില്ല അല്ലെങ്കിൽ മലവിസര്‍ജ്ജനം നടത്തിയതിന് ശേഷവും വിസര്‍ജ്ജനം പൂര്‍ണ്ണമായില്ലെന്ന തോന്നൽ എന്നിവയെല്ലാം വൻകുടൽ ക്യാൻസറിന്റെ ലക്ഷണങ്ങൾ ആയേക്കാം.
വൻകുടലിലെ കോശങ്ങൾ അവയുടെ ഡിഎൻഎയിൽ മാറ്റങ്ങൾ വരുത്തുമ്പോഴാണ് വൻകുടൽ ക്യാൻസർ ഉണ്ടാകുന്നത്. അമിതമായ ശരീരഭാരം രോഗം ഉണ്ടാകാനുള്ള സാധ്യത വര്‍ദ്ധിപ്പിക്കുന്നതാണ്. ശാരീരിക പ്രവര്‍ത്തനങ്ങളുടെ അഭാവവും രോഗസാധ്യത കൂടുതലാക്കുന്നു. കൂടാതെ വന്‍കുടല്‍ ക്യാന്‍സര്‍, പോളിപ്സ് തുടങ്ങിയ രോഗചരിത്രമുള്ള കുടുംബ പശ്ചാത്തലവും രോഗബാധയ്ക്കുള്ള സാധ്യത കൂട്ടുന്നു. അതിനാൽ തന്നെ രോഗലക്ഷണങ്ങൾ കണ്ടെത്തിയാൽ ഉടൻതന്നെ ആരോഗ്യവിദഗ്ധരുടെ സേവനം തേടേണ്ടത് അത്യാവശ്യമാണെന്ന് ഡോക്ടർമാർ പറയുന്നു.
