കൊച്ചി: സംസ്ഥാനത്ത് ഉടനീളമുള്ള അനധികൃത ഫ്ലക്സുകളും ബോര്ഡുകളും നീക്കം ചെയ്യാത്തതില് രൂക്ഷ വിമര്ശനവുമായി ഹൈക്കോടതി. കൊച്ചിയില് ഇത്തരം നൂറുകണക്കിന് ബോര്ഡുകള് നിറഞ്ഞിരിക്കുമ്പോഴാണ് 50 എണ്ണം നീക്കിയെന്ന് കോര്പറേഷന് പറയുന്നത്. തിരുവനന്തപുരത്ത് നിന്ന് ബോര്ഡുകള് നീക്കം ചെയ്തെന്നാണ് കോര്പറേഷന് പറയുന്നത്, എന്നാല് താന് പരിശോധനയ്ക്ക് ആളെ വയ്ക്കട്ടെ എന്നും കോടതി ചോദിച്ചു. തലസ്ഥാന നഗരിയില് തന്നെ ഇത്തരം കാര്യങ്ങള് നടക്കുന്നത് ഭരണസംവിധാനത്തിന്റെ സമ്പൂര്ണ്ണ പരാജയത്തെയാണ് കാണിക്കുന്നതെന്ന് ജസ്റ്റിസ് ദേവന് രാമചന്ദ്രന് കുറ്റപ്പെടുത്തി.
എന്തുകൊണ്ടാണ് ഇത്തരത്തിലുള്ള അനധികൃത ബോര്ഡുകള് നീക്കം ചെയ്യാത്തതില് നടപടി കൈക്കൊള്ളാത്തതെന്ന് കൊച്ചിയിലേയും തിരുവനന്തപുരത്തേയും കാര്യങ്ങള് ചൂണ്ടിക്കാട്ടി കോടതി ആരാഞ്ഞു. നിയമരാഹിത്യമാണു കേരളത്തെ നയിക്കുന്നത്. എന്നിട്ടും നവകേരളമാണെന്ന് പറയുന്നു. കോടതി ചൂണ്ടിക്കാട്ടിയ നിയമലംഘനങ്ങള്ക്കെതിരെ മാത്രമാണ് നടപടിയെടുക്കുന്നതെന്നു വ്യക്തമാണെന്നും ഇത് സ്വീകാര്യമല്ലെന്നും ഹൈക്കോടതി പറഞ്ഞു. അധികാരത്തിലിരിക്കുന്നവരോ രാഷ്ട്രീയ പാര്ട്ടികളോ ആണ് ഭൂരിഭാഗം ബോര്ഡുകളും കൊടികളും സ്ഥാപിച്ചിരിക്കുന്നത്. ഇത്തരം കാര്യങ്ങളില് നിന്ന് തിരുവനന്തപുരം നഗരത്തെ മോചിപ്പിച്ച് പരമാവധി തുക ലഭ്യമാക്കാനാണു കോടതി ലക്ഷ്യമിടുന്നത്.
എന്നാല് ഇനി ഇക്കാര്യത്തില് അനാസ്ഥ കാണിക്കുന്ന ഉദ്യോഗസ്ഥര്ക്കെതിരെ കോടതിയലക്ഷ്യമുള്പ്പെടെയുള്ള നടപടിയെടുക്കും. ഇവരില്നിന്നു നഷ്ടം ഈടാക്കുമെന്നും കോടതി പറഞ്ഞു.
കഴിഞ്ഞ ഒന്നരവര്ഷമായി കൊച്ചിയിലെ 9000 അനധികൃത ബോര്ഡുകള് നീക്കം ചെയ്തെന്നു കോര്പറേഷന് അറിയിച്ചു. എന്നാല് എത്രരൂപ പിഴ ഈടാക്കിയെന്നു കോടതിയെ അറിയിക്കാനായില്ല. നൂറുക്കണക്കിനു ബോര്ഡുകളുണ്ടായിരുന്നു. എന്നിട്ടാണ് 50 എണ്ണം മാറ്റിയെന്നു പറയുന്നതെന്നും കോടതി കുറ്റപ്പെടുത്തി. ലക്ഷക്കണക്കിനു രൂപ വേണ്ടാത്തതു കൊണ്ടാണോ അതോ ആരെയെങ്കിലും പേടിക്കുന്നതു കൊണ്ടാണോ ഇങ്ങനെ ചെയ്യുന്നത് ഒരു രാഷ്ട്രീയ പാര്ട്ടി നേതാവ് സ്കൂട്ടറുകള് സമ്മാനിക്കുന്നതിനെക്കുറിച്ച് നഗരം മുഴുവന് ബോര്ഡുകള് നിറഞ്ഞിരിക്കുകയാണെന്ന് കോടതി ചൂണ്ടിക്കാട്ടി.
