എറണാകുളം: മുനമ്പത്ത് വഖഫ് നിയമത്തിന്റെ മറ പിടിച്ച് പാവപ്പെട്ട അന്യമതസ്ഥരുടെ ഭൂമി കയ്യേറാനുള്ള ശ്രമത്തിനെതിരെ പള്ളിമുറ്റത്ത് നടക്കുന്ന നിരാഹാരസമരത്തിന് പിന്തുണ പ്രഖ്യാപിച്ച് ഡെമോക്രാറ്റിക് സോഷ്യൽ ജസ്റ്റിസ് പാർട്ടിയും, നാഷണൽ ഹിന്ദു ലീഗും. ഇതിന്റെ ഭാഗമായി ഡി എസ് ജെ പി- ലീഗ് നേതാക്കൾ സമരപ്പന്തൽ സന്ദർശിച്ചു. നിരാഹാര സമരം അനുഷ്ഠിക്കുന്നവരെ ഷാൾ അണിയിച്ച നേതാക്കൾ എല്ലാ വിധ സഹകരണങ്ങളും വാഗ്ദാനം ചെയ്തു.
നൂറ്റാണ്ടുകളായി സാധാരണ ജനങ്ങൾ കൈവശം വെച്ചിരിക്കുന്നു ഭൂമി ഒരു സുപ്രഭാതത്തിൽ വഖഫ് നിയമത്തിന്റെ പേരിൽ കയ്യേറാമെന്ന് ആരും സ്വപ്നം കാണേണ്ടതില്ലെന്ന് ഡി എസ് ജെ പി പ്രസിഡൻറ് കെഎസ്ആർ മേനോൻ പറഞ്ഞു. യുക്തിക്ക് നിരക്കാത്ത വഖഫ് നിയമം മാറ്റിയെഴുതാൻ മോദി സർക്കാർ കൊണ്ടുവന്നിട്ടുള്ള ഭേദഗതികളെ സ്വാഗതം ചെയ്യുന്നുവെന്നും അദ്ദേഹം വ്യക്തമാക്കി. ഡി എസ് ജെ പി, നാഷണൽ ലീഗ് നേതാക്കന്മാർ സമര കൺവീനർ ജോസഫ് ബെന്നി, മുനമ്പം വേളാങ്കണ്ണി പള്ളി വികാരി ആന്റണി സേവിയർ തറയിൽ, ജൂനിയർ ഫാദർ ആന്റണി തോമസ് പോളക്കാട്ട് എന്നിവരുമായും ആശയവിനിമയം നടത്തി.
ഭാരതം മുഴുവൻ പിടിച്ചടക്കാൻ ഉതകുന്ന വിധം ചിലർ ദുർവ്യാഖ്യാനം ചെയ്യുന്ന ഈ കരിനിയമം റദ്ദാക്കണമെന്ന് നാഷണൽ ഹിന്ദു ലീഗ് ജനറൽ സെക്രട്ടറി മുക്കാപുഴ നന്ദകുമാർ ആവശ്യപ്പെട്ടു. വഖഫ് നിയമം നടപ്പിലാക്കിയാൽ മുനമ്പം ഭൂമി ഉടമകൾ വഴിയാധാരമാകും എന്നറിഞ്ഞിട്ടും അവരെ മറന്നുകൊണ്ട് കേരള നിയമസഭ കേന്ദ്ര സർക്കാറിന്റെ വഖ്ഫ് നിയമ ഭേദഗതി ബില്ലിനെതിരെ ഐകകണ്ഠേന പ്രമേയം പാസാക്കിയതിനെ നേതാക്കൾ ശക്തിയായി അപലപിച്ചു.
ഡിഎസ്ജെപി നാഷണൽ ഹിന്ദു ലീഗ് നേതാക്കളായ പുത്തേഴത്ത് ശശിധര മേനോൻ, ഡോക്ടർ രാജീവ്, മുരളീധരൻ മുപ്പത്തടം ഹരികുമാർ എന്നിവരും സമരത്തിൽ പങ്കെടുത്തു.
