പാലക്കാട്: ദീപാവലി ആഘോഷത്തിന് മധുരം പകരാൻ സ്വീറ്റ്‌സ് വിപണി സജീവമായിക്കഴിഞ്ഞു. അജ്‌മേർ പേഡ, ബൂസ്റ്റ് ബർഫി, ഹോർലിക്‌സ് ബർഫി, മിൽക്ക് ബർഫി, കാജു ബർഫി തുടങ്ങിയ മധുരവിപണിയിൽ വൈവിധ്യങ്ങൾ നിറച്ചുകഴിഞ്ഞു. പ്രമുഖ ബേക്കറികളെല്ലാം ദീപാവലി സ്‌പെഷ്യൽ സ്വീറ്റ്‌സ് വിപണികളിൽ ഇറക്കിക്കഴിഞ്ഞു.
ഇതിനോടൊപ്പം ദീപാവലി ഗിഫ്റ്റുകളുടെയും സ്വീറ്റ്‌സുകളുടെയും പാക്കുകളും എല്ലാ കടകളിലും ഇടം പിടിച്ചുകഴിഞ്ഞു. 120 ൂപ വിലയുള്ള സീപാവലി സ്‌പെഷ്യൽ സ്വീറ്റ് പാക്കറ്റ് വിപണിയിൽ ഇറക്കിയിട്ടുണ്ട്. പാലും നെയ്യും ഉപയോഗിച്ചുള്ള സ്വീറ്റ്‌സുകൾക്കാണ് വിപണിയിൽ ആവശ്യക്കാരേറെ. 5 ഇനം മധുര പലഹാരങ്ങൾ മുതൽ 25 ഇനം മധുരപലഹാരങ്ങൾ വരെ അടങ്ങിയ സ്വീറ്റ്‌സ് ബോക്‌സുകളാണ് കടകളിൽ തയ്യാറാക്കിലിട്ടുള്ളത്.
പല വെറൈറ്റി പേടകളും മറ്റ് പലഹാരങ്ങളും തയ്യാറായിക്കഴിഞ്ഞു. സ്‌ട്രോബറി, പിസ്ത തുടങ്ങി പല തരത്തിലുള്ള പേടകൾ മാത്രം നിറച്ചുകൊണ്ടുള്ള ബോക്‌സുകളും നേരത്തെ മുതൽ വിപണിയിലുള്ള തരത്തിൽ ഹൽവ, മൈസൂർ പാക്ക്, ജിലേബി, ലഡു, ലഡു മിക്‌സചർ, പാൽഗോവ എന്നിങ്ങനെയുള്ളവ നിറച്ച ബോക്‌സുകളും വിപണിയിൽ ലഭ്യമാണ്.
120 രൂപ മുതൽ, 300 രൂപ വരെ വിലയുള്ള ബോക്‌സുകൾ വിപണിയിലുണ്ട്. ഓൺലൈനിലും തകൃതിയായി ദീപാവലി മധുരത്തിന്റെ വിൽപ്പന നടക്കുന്നുണ്ട്. പല ഓൺലൈൻ പ്ലാറ്റ്‌ഫോമുകളും പലതരത്തിലുള്ള ഓഫറുകൾ ദീപാവലി സ്വീറ്റ്‌സുകൾക്കും മറ്റ് ഗിഫ്റ്റുകൾക്കും നൽകിയിട്ടുണ്ട്.
