കാഞ്ഞങ്ങാട്: കാസർകോട് നീലേശ്വരത്ത് തെയ്യം കളിയാട്ടത്തിനിടെ വൻ പൊട്ടിത്തെറി. അഞ്ഞൂറ്റമ്പലം വീരർകാവ് കളിയാട്ട മഹോത്സവത്തിനിടെ പടക്കങ്ങള് സൂക്ഷിച്ച സ്ഥലത്താണ് പൊട്ടിത്തെറി ഉണ്ടായത് . സംഭവത്തിൽ 154 പേര്ക്ക് പരിക്കേറ്റു.
അപകടത്തിൽ പരിക്കേറ്റ് 97 പേരാണ് ചികിത്സയിലുള്ളത്. അപകടത്തിൽ പരിക്കേറ്റവരിൽ എട്ടുപേരുടെ നില ഗുരുതരമാണെന്ന് ജില്ല കളക്ടര് ഇമ്പശേഖര് പറഞ്ഞു. അപകടത്തിൽ കേസെടുത്ത പോലീസ് അഞ്ചൂറ്റമ്പലം വീരര്കാവ് കമ്മിറ്റി പ്രസിഡന്റിനെയും സെക്രട്ടറിയെയും കസ്റ്റഡിയിലെടുത്തു.
കളിയാട്ട മഹോത്സവത്തിനിടെ പടക്കം പൊട്ടിച്ചതിന്റെ തീപ്പൊരി, പടക്കങ്ങള് സൂക്ഷിച്ചിരുന്ന സ്ഥലത്ത് വീണതാണ് അപകട കാരണമെന്നാണ് നിഗമനം. മാല പടക്കം പൊട്ടിച്ചപ്പോള് ഇതില് നിന്നുള്ള തീപ്പൊരി പടക്കങ്ങള് സൂക്ഷിച്ച സ്ഥലത്തേക്ക് തെറിച്ച് വലിയ രീതിയിലുള്ള പൊട്ടിത്തെറിയുണ്ടാകുകയായിരുന്നു.
