ഇക്കാലത്ത് ഇൻഡോർ പ്ലാന്റുകൾക്ക് വലിയ ഡിമാന്റ് ആണ്. കടയിൽ നിന്നും വാങ്ങിയും വീടുകളിലുള്ള മണി പ്ലാന്റ് പോലുള്ള ചെടികളെ വെട്ടി കുപ്പിയിലാക്കിയും നമ്മൾ ചെടികൾ വളർത്താറുണ്ട്. ചിലർ മണ്ണിലാണെങ്കിൽ മറ്റ് ചിലർ കുപ്പിയിലാണ് ഇൻഡോർ ചെടികൾ വളർത്താറ്. എന്നാൽ, ഇത്തരത്തിൽ വീട്ടിൽ വെള്ളത്തിൽ ചെടി വളർത്തുന്നവർ ചില കാര്യങ്ങൾ പ്രത്യേകം ശ്രദ്ധിക്കണം…
അത്യാവശ്യം കട്ടിയുള്ള ചില്ലുകുപ്പികൾ അല്ലെങ്കിൽ പാത്രങ്ങൾ വേണം ചെടി വളർത്താൻ തിരഞ്ഞെടുക്കേണ്ടത്. പാത്രത്തിൽ ഒഴിക്കുന്ന വെള്ളത്തിൽ ക്ലോറിന്റെ അംശം ഉണ്ടാവാതിരിക്കാൻ പ്രത്യേകം ശ്രദ്ധിക്കണം. പാത്രം ശുദ്ധവെള്ളത്തിൽ നന്നായി കഴുകിയ ശേഷം വേണം അതിൽ വെള്ളം നിറക്കാൻ. ഓരോ ചെടിക്കും അനുയോജ്യമായ തരത്തിൽ വേണം വെള്ളം ഒഴിക്കാൻ. ലക്കി ബാംബൂ, മണി പ്ലാന്റ്, പോത്തോ, പീസ് ലില്ലി, തുടങ്ങിയ ചെടികളെല്ലാം വെള്ളത്തിലും വളരുന്നവയാണ്.
വടിനുള്ളിലെ ചില്ലു കുപ്പികളിൽ ചെടികൾ വയ്ക്കുന്നവർ നേരിടുന്ന മറ്റൊരു വലിയ പ്രശ്നമാണ് കൈ തട്ടിയും മറ്റും പാത്രം താഴെ വീണ് പൊട്ടിപോവുന്നത്. ഈ പ്രശ്നം ഒഴിവാക്കാനായി ഡബിൾ സൈഡ് സ്റ്റിക്കർ നമ്മെ സഹായിക്കും. ഇത്തരം സ്റ്റിക്കർ ഉപയോഗിച്ച് പാത്രം ഉറപ്പിച്ച് വച്ചാൽ, പാത്രം താഴെ വീഴില്ല. സൂര്യപ്രകാശം അത്യാവശ്യത്തിന് മാത്രം കിട്ടുന്ന സ്ഥലത്ത് വേണം ഇൻഡോർ പ്ലാന്റുകൾ വയ്ക്കാൻ. എന്നാൽ, സൂര്യപ്രകാശം ഒരുപാട് അടിക്കുന്ന സ്ഥലത്ത് ഇത് വയ്ക്കാതിരിക്കുക.
ചെടികൾ നല്ലപോലെ ശ്രദ്ധിക്കുകയും വേണം. ഇലകൾ മഞ്ഞ നിറമാകുന്നത് കണ്ടാൽ ഉടൻ തന്നെ വെള്ളം മാറ്റി നല്ല വെള്ളം നിറക്കുക. ചെടികൾക്ക് വേരുകൾ വരാൻ താമസം ഉണ്ടെന്ന് തോന്നുകയാണെങ്കിൽ അൽപ്പം പോട്ടിംഗ് മിശ്രിതം ചേർത്തുകൊടുക്കാം വേര് വന്നതിന് ശേഷം ഇത് മാറ്റിക്കൊടുത്താൽ മതി.
Discussion about this post