മത്തങ്ങ കൊണ്ട് ബോട്ട് നിര്‍മ്മിച്ച് അതില്‍ സഞ്ചരിച്ച് ഗിന്നസ് റെക്കോര്‍ഡിലിടം നേടിയിരിക്കുകയാണ് അമേരിക്കക്കാരനായ ഒരു സാഹസിക സഞ്ചാരി. യുഎസിലെ വാഷിങ്ടണിലാണ് 46 കാരനായ ഗാരി ക്രിസ്റ്റെന്‍സന്‍ ഈ സാഹസിക പരീക്ഷണം നടത്തിയത്.
എന്നാല്‍ മത്തങ്ങ കൊണ്ട് ബോട്ട് നിര്‍മ്മിക്കാനാവുമോ എന്ന് ചിന്തിക്കാന്‍ വരട്ടെ. എന്നാല്‍ ഭീമാകാരമായ മത്തങ്ങയിനമാണ് ഇദ്ദേഹം ബോട്ട് നിര്‍മിക്കാനുപയോഗിച്ചത്. ഒറിഗോണിലെ ഹാപ്പിവാലിയില്‍ റിയല്‍ എസ്റ്റേറ്റ് ബിസിനസുകാരനായ ഗാരി തന്റെ കൃഷി സ്ഥലത്ത് 2011 മുതല്‍ ഭീമാകാരമായ മത്തങ്ങകള്‍ വളര്‍ത്തിയിരുന്നു.
ബോട്ട് നിര്‍മിക്കാനായി ജൂലൈ 14ന് മത്തങ്ങ നട്ടു. ഒക്ടോബര്‍ 4ന് അത് വിളവെടുക്കുകയും ചെയ്തു. പിന്നീട് മത്തങ്ങ തുരന്ന് ബോട്ട് നിര്‍മിക്കാന്‍ തുടങ്ങി. ഒക്ടോബര്‍ 12 മുതല്‍ 13 വരെ 26 മണിക്കൂര്‍ കൊണ്ട് 46 കാരനായ അദ്ദേഹം തന്റെ കൈകൊണ്ടാണ് ബോട്ട് കൊത്തിയെടുത്തത്.
കാലങ്ങളായി മത്തങ്ങയില്‍ ബോട്ട് നിര്‍മിക്കാന്‍ ആഗ്രഹിച്ചിരുന്നുവെന്നും ഈ മത്തങ്ങ അതിനായി തന്നെയാണ് വളര്‍ത്തിയതെന്നും ഗാരി പറഞ്ഞു. പിന്നീട് 555.2 കിലോ ഭാരമുള്ള മത്തങ്ങ ബോട്ടായപ്പോള്‍ ഇതിന് 429.26 സെന്റിമീറ്റര്‍ (169 ഇഞ്ച്) ചുറ്റളവുണ്ടായി. ഒരു വലിയ പിയാനോയുടെ വലുപ്പവും ഭാരവുമെന്നാണ് ഗാരി വിശേഷിപ്പിച്ചത്.
കൊളംബിയ നദിയാണ് മത്തങ്ങ ബോട്ട് തുഴയാന്‍ തിരഞ്ഞെടുത്തത്. വാഷിംഗ്ടണിലെ നോര്‍ത്ത് ബോണവില്ലില്‍ നിന്ന് ആരംഭിച്ച്, വാഷിംഗ്ടണിലെ വാന്‍കൂവറിലേക്കായിരുന്നു മത്തങ്ങ ബോട്ടില്‍ ഗാരി യാത്ര ചെയ്തത്.
73.50 കിലോമീറ്റര്‍ (45.67 മൈല്‍) യാത്ര നടത്തിയ ഗാരി ഇതോടെ റെക്കോര്‍ഡിലിടം നേടുകയായിരുന്നു.
Discussion about this post