പാലക്കാട്: കല്ലടിക്കോട് പനയമ്പാടത്ത് സിമന്റ് ലോറി ഇടിച്ചുകയറി മരണപ്പെട്ട നാല് സ്കൂള് വിദ്യാര്ഥിനികളുടെയും കബറടക്കം വെള്ളിയാഴ്ച നടക്കും. രാവിലെ ആറരയോടെ മൃതദേഹങ്ങള് ആശുപത്രിയില്നിന്ന് വീടുകളിലെത്തിച്ചു. രണ്ടു മണിക്കൂര്നേരം ബന്ധുമിത്രാദികള്ക്ക് അവസാനമായി ഒരു നോക്ക് കാണാനായി വീടുകളില് പൊതുദര്ശനം നടക്കും. തുടര്ന്ന് 8.30-ഓടെ തുപ്പനാട് കരിമ്പനയ്ക്കല് ഹാളിലേക്ക് മൃതദേഹങ്ങള് കൊണ്ടുവരും.
10 മണിവരെ ഇവിടെ പൊതുദര്ശനത്തിനുവെച്ചശേഷം കബറടക്കത്തിനായി തുപ്പനാട് ജുമാമസ്ജിദിലേക്ക് മൃതദേഹങ്ങള് എത്തിക്കും. കുട്ടികള് പഠിച്ചിരുന്ന കരിമ്പ ഹയര്സെക്കന്ഡറി സ്കൂളില് പൊതുദര്ശനം ഉണ്ടായിരിക്കില്ല.
വൈകിട്ട് പരീക്ഷ കഴിഞ്ഞ് എട്ടാം ക്ലാസ് വിദ്യാര്ഥിനികള് വീട്ടിലേക്കു മടങ്ങാന് ബസ് സ്റ്റോപ്പില് നില്ക്കുമ്പോഴായിരുന്നു ദാരുണമായ അപകടം. നിയന്ത്രണം വിട്ട ലോറി വിദ്യാഥിനികളുടെ നേരെ പാഞ്ഞുകയറുകയായിരുന്നു.
