മുംബൈ: ഇ-പാന് കാര്ഡ് ഡൗണ്ലോഡ് ചെയ്യാന് സഹായിക്കാമെന്ന തരത്തിലുള്ള ഇ-മെയില് സന്ദേശം ആരെങ്കിലും നിങ്ങള്ക്ക് അയച്ചിട്ടുണ്ടോ? ഉണ്ടെങ്കില് ജാഗ്രത പാലിക്കുക, ഇതൊരുവമ്പന് തട്ടിപ്പാണ്. ഇത്തരം ഇ-മെയിലുകളില് വീഴരുതെന്ന് കേന്ദ്രസര്ക്കാര് മുന്നറിയിപ്പ് നല്കി.
ആദായനികുതി വകുപ്പില് നിന്നുള്ളതാണെന്ന് അവകാശപ്പെടുന്ന വ്യാജ ഇ-മെയിലുകളാണിതെന്ന് പ്രസ് ഇന്ഫര്മേഷന് ബ്യൂറോ കണ്ടെത്തിയിരിക്കുകയാണ്. ഇ-പാന് കാര്ഡുകള് ഡൗണ്ലോഡ് ചെയ്യാന് പ്രേരിപ്പിക്കുന്ന ഒരു ഫിഷിങ് തട്ടിപ്പാണിതെന്നും പിഐബി ഫാക്ട് ചെക്ക് മുന്നറിയിപ്പ് നല്കി.
സര്ക്കാരിന്റെ പാന് 2.0 പദ്ധതിയെ അവസരമായി കണ്ട് ഉപഭോക്താക്കളെ കബളിപ്പിക്കാനാണ് സൈബര് ക്രിമിനലുകള് വ്യാജ ഇ-മെയിലുകള് ഉപയോഗിക്കുന്നത്. ഇത്തരം ഫിഷിങ് തട്ടിപ്പുകളില് വീഴരുതെന്നും പിഐബി ഓര്മ്മിപ്പിച്ചു.’ഇവയ്ക്ക് ഒരിക്കലും മറുപടി നല്കരുത്.’- പിഐബി ഫാക്ട് ചെക്ക് എക്സില് പങ്കുവെച്ച കുറിപ്പില് മുന്നറിയിപ്പ് നല്കി.
ഉപയോക്താവിന്റെ യൂസര് നെയിം, പാസ്വേഡുകള്, ക്രെഡിറ്റ് കാര്ഡ് വിശദാംശങ്ങള് എന്നിവ പോലുള്ള സെന്സിറ്റീവ് വിവരങ്ങള് നേടാന് ശ്രമിക്കുന്ന പ്രക്രിയയാണ് ഇവര് നടത്തുന്നത്.. ധനകാര്യ സ്ഥാപനങ്ങള്, സോഷ്യല് വെബ്സൈറ്റുകള്, ഓണ്ലൈന് പേയ്മെന്റ് പ്രോസസ്സറുകള് അല്ലെങ്കില് ഐടി അഡ്മിനിസ്ട്രേറ്റര്മാര് എന്നിവയില് നിന്നുള്ളതെന്ന് അവകാശപ്പെടുന്ന ഇലക്ട്രോണിക് ആശയവിനിമയത്തിലൂടെയാണ് തട്ടിപ്പ്.ഫിഷിങ് സാധാരണയായി ഇ-മെയില് അല്ലെങ്കില് ഇന്സ്റ്റന്റ് മെസേജുകള് വഴിയാണ് നടത്തുന്നത്.
Discussion about this post