അന്ന് പണം നൽകി ജയിൽ ജീവിതം ആസ്വദിച്ച ബോച്ചെ; ഇന്ന് സർക്കാർ ചെലവിൽ ഇഷ്ടം പോലെ ആസ്വദിക്കാമല്ലോ എന്ന് സോഷ്യൽമീഡിയ

കൊച്ചി: നടി ഹണി റോസ് നൽകിയ ലൈംഗികാധിക്ഷേപ പരാതിയിൽ അറസ്റ്റിലായിരിക്കുകയാണ് വ്യവസായിയായ ബോബി എറണാകുളം സെൻട്രൽ പൊലീസ് ആണ് അറസ്റ്റ് രേഖപ്പെടുത്തിയത്. കൊച്ചിയിൽ എത്തിച്ച ശേഷം സെൻട്രൽ എ.സി.പിയുടെ നേതൃത്വത്തിൽ വിശദമായി ചോദ്യം ചെയ്ത ശേഷമാണ് അറസ്റ്റ് രേഖപ്പെടുത്തിയത്.നാളെ കോടതിയിൽ ഹാജരാക്കും. ഈ വാർത്തകൾക്കിടെ പണ്ട് ജയിൽ ജീവിതം എങ്ങനെയുണ്ടെന്ന് അനുഭവിച്ചറിയാൻ ബോബി ചെമ്മണ്ണൂർ തെലങ്കാന വരെ പോയ കഥ സോഷ്യൽമീഡിയയിൽ വീണ്ടും ചർച്ചയാവുകയാണ്. 2018 ലായിരുന്നു സംഭവം.

തെലങ്കാനയിലെ ‘ഫീൽ ദ ജയിൽ’ പദ്ധതി പ്രകാരം ആണ് ബോബി ചെമ്മണ്ണൂർ ഒരു ദിവസം ജയിൽ ‘ശിക്ഷ’ അനുഭവിച്ചത്. ടൂറിസം പരിപാടിയുടെ ഭാഗമായിട്ടായിരുന്നു ഈ പദ്ധതി. സംഗരറെഡ്ഡിയിലെ ഹെറിറ്റേജ് ജയിൽ മ്യൂസിയത്തിൽ ആയിരുന്നു താമസം. 500 രൂപയാണ് ബോബി ചെമ്മണ്ണൂർ ഇതിനായി ചെലവിട്ടത്.

ടൂറിസം പോലെ ആണ് പരിപാടി എങ്കിലും ജയിൽ വസ്ത്രങ്ങൾ ധരിച്ച് തന്നെ വേണം അകത്ത് കടക്കാൻ. 24 മണിക്കൂർ ജയിൽ വാസത്തിനിടെ, ജയിൽ വസ്ത്രങ്ങൾ ധരിച്ച് ബോബി ചെമ്മണ്ണൂർ ചെടി നനക്കുകയും നിലം തുടക്കുകയും ഒക്കെ ചെയ്തിട്ടുണ്ട്. 24 മണിക്കൂറിലെ ജയിൽ വാസത്തിൽ ഫോൺ ഉപയോഗിക്കാൻ പറ്റില്ല.ജയിലിലെ അന്തേവാസികൾക്ക് കൊടുക്കുന്ന അതേ ഭക്ഷണം തന്നെയാണ് ഇങ്ങനെ എത്തുന്നവർക്കും കൊടുക്കുക.

15 വർഷങ്ങൾക്ക് മുൻപ് കേരളത്തിലെ ജയിലിൽ കഴിയാൻ ഒരു ശ്രമം നടത്തിയിരുന്നു. എന്നാൽ, കുറ്റം ചെയ്താൽ മാത്രമേ കേരളത്തിലെ ജയിലിൽ പാർപ്പിക്കൂ എന്ന് പറഞ്ഞ് തിരിച്ചയക്കുകയായിരുന്നുവത്രേ. എന്തായാലും അഞ്ച് പൈസ ചിലവിടാതെ ഫ്രീയായി ജയിലിൽ ഇനി കഴിയാമല്ലോ എന്നാണ് ആളുകൾ പരിഹസിക്കുന്നത്.