പ്രയാഗ് രാജ്: മഹാകുംഭമേളയുടെ നാലാം ദിവസമായ വ്യാഴാഴ്ച വൈകുന്നേരം ഗംഗ, യമുന,’ സരസ്വതി നദികളുടെ സംയോജന കേന്ദ്രമായ ത്രിവേണി സംഗമത്തിൽ പുണ്യസ്നാനം നടത്തി 25 ലക്ഷത്തിലധികം ഭക്തർ.
വ്യാഴാഴ്ച വൈകുന്നേരം 5 മണിയോടെ 25 ലക്ഷത്തിലധികം ആളുകൾ പ്രയാഗ്രാജിലെ മഹാകുംഭത്തിൽ പങ്കെടുക്കുകയും സംഗമത്തിൽ പുണ്യസ്നാനം നടത്തുകയും ചെയ്തുവെന്ന് കണക്കുകൾ സൂചിപ്പിക്കുന്നു. 10 ലക്ഷത്തിലധികം കല്പവാസികളും 15 ലക്ഷത്തിലധികം അധിക തീർത്ഥാടകരും ഉണ്ടായിരുന്നു.
തീർത്ഥാടകരുടെ വൻ ഒഴുക്ക് കണക്കിലെടുത്ത്, കാണാതാകുന്നവരെ കണ്ടെത്തുന്നതിനായി പ്രയാഗ്രാജ് ഭരണകൂടം ഒരു AI അധിഷ്ഠിത കമ്പ്യൂട്ടർവത്കൃത സംവിധാനവും സ്ഥാപിച്ചിട്ടുണ്ട്.
ലോകത്തിലെ ഏറ്റവും വലിയ മതസമ്മേളനത്തിൽ 60 ദശലക്ഷത്തിലധികം ഭക്തർ പങ്കെടുത്തു. ജനുവരി 14 ന് മകരസംക്രാന്തി ദിനത്തിൽ 35 ദശലക്ഷത്തിലധികം പേർ പങ്കെടുത്തിട്ടുണ്ട്. വിദേശ മാദ്ധ്യമങ്ങൾ അടക്കം വലിയ ആശ്ചര്യത്തോടെയാണ് കുംഭമേള നോക്കി കാണുന്നത്.
ഉത്സവങ്ങളുടെ ഉത്സവം എന്നാണ് കുംഭമേളയെ കുറിച്ച് പ്രശസ്ത അന്താരാഷ്ട്ര മാദ്ധ്യമമായ ദി ഗാർഡിയൻ എഴുതിയത്. മേളയുടെ വലുപ്പത്തെയും സംഘാടന മികവിനെയും അത്ഭുതത്തോടെ നോക്കുകയാണ് ബി ബി സി, സി എൻ എൻ പോലുള്ള മാദ്ധ്യമങ്ങൾ.
