ബംഗളൂരു: ഡിജിറ്റല് അറസ്റ്റ് ഭീഷണി തട്ടിപ്പിന് പിന്നാലെ പുതിയ സൈബര് തട്ടിപ്പ് കളത്തിലിറങ്ങുന്നു. ബാങ്ക് അധികൃതരെന്ന വ്യാജേന ഉപയോക്താക്കളെ സമീപിച്ച് സൗജന്യ മൊബൈല് ഫോണ് സമ്മാനമായി നല്കി പണം തട്ടുന്നതാണ് ഈ സംഘത്തിന്റെ രീതി.
സൗജന്യ മൊബൈല് അല്ലെങ്കില് ടാബ്ലെറ്റ് സമ്മാനമായി നല്കി ബാങ്ക് വിശദാംശങ്ങളെല്ലാം ഇവര് ചോര്ത്തിയെടുക്കുന്നു ഫോണില് സിം കാര്ഡ് ഇടുമ്പോള് എല്ലാ ബാങ്കിങ് വിശദാംശങ്ങളും ഒടിപികളും തട്ടിപ്പ് സംഘത്തിന് ലഭിക്കും. ഇത്തരത്തില് ഐടി ജീവനക്കാരന് 2.8 കോടി രൂപ നഷ്ടപ്പെട്ടതായി ബംഗളൂരു പൊലീസില് പരാതി ലഭിച്ചു
സ്വകാര്യ ബാങ്ക് പ്രതിനിധിയെന്ന വ്യാജേന എത്തിയ ആള് മൊബൈല് ഫോണ് സമ്മാനമായി നല്കി പണം തട്ടുകയായിരുന്നുവെന്ന് ഡെപ്യൂട്ടി പൊലീസ് കമ്മീഷണര് (വൈറ്റ്ഫീല്ഡ്) ശിവകുമാര് ഗുണാരെ പറഞ്ഞു. ക്രെഡിറ്റ് കാര്ഡ് അപ്രൂവായിട്ടുണ്ടെന്നും ഉയര്ന്ന ക്രെഡിറ്റ് സ്കോര് ഉള്ളതിനാല് മൊബൈല് ഫോണ് സമ്മാനമുണ്ടെന്നും പറഞ്ഞ് മൊബൈല് ഫോണ് കൈമാറുകയായിരുന്നു. ക്ലോണിങ് സോഫ്റ്റ്വെയര് ഇന്സ്റ്റാള് ചെയ്തിട്ടുള്ള ഫോണിലേക്ക് സിം കാര്ഡ് ഇട്ടതോടെ ബാങ്കില് നിന്നുള്ള സന്ദേശങ്ങളോ ഇമെയിലുകളോ ഈ ഡിവൈസില് ലഭിക്കില്ല.
തട്ടിപ്പ് നടന്ന് ഒരാഴ്ചയ്ക്ക് ശേഷമാണ് അക്കൗണ്ടില് നിന്ന് പണം നഷ്ടപ്പെട്ട വിവരം പരാതിക്കാരന് അറിയുന്നത്.
Discussion about this post