എറണാകുളം: ഇന്ത്യയെ കുറിച്ച് വാനോളം പുകഴ്ത്തി ഇക്കിഗായ് സഹ എഴുത്തുകാരൻ ഫ്രാൻസെസ്‌ക് മിറാലെസ്. ഇന്ത്യയുടെ ആത്മീയതയോട് തനിക്ക് എപ്പോഴും ആകർഷണീയത തോന്നിയിട്ടുണ്ട്. ഇന്ത്യയിലേക്കുള്ള യാത്ര തന്റെ ചിന്താഗതി തന്നെ മാറ്റിയെന്നും അദ്ദേഹം വ്യക്തമാക്കി. കൊച്ചി ജെയിൻ യൂണിവേഴ്സിറ്റി ആഥിതേയത്വം വഹിക്കുന്ന സമ്മിറ്റ് ഓഫ് ഫ്യൂച്ചർ 2025ലെ നിങ്ങളുടെ ജീവിതലക്ഷ്യം കണ്ടെത്തുക എന്ന വിഷയത്തിൽ നടന്ന ചർച്ചയിലായിരുന്നു അദ്ദേഹത്തിന്റെ പരാമർശം.
ഈ സംവാദത്തിൽ ഇക്കിഗായ് എന്ന പുസ്തകം എഴുതിയതിനെക്കുറിച്ചും അദ്ദേഹം പറഞ്ഞു. ഇന്ത്യയുമായി തനിക്ക് ആഴത്തിൽ ബന്ധമുണ്ടെന്നും അദ്ദേഹം വ്യക്തമാക്കി. ഇന്ത്യയിലേക്കുള്ള യാത്ര തഴന്റ ചിന്താഗതി തന്നെ മാറ്റിമറിച്ചിട്ടുണ്ട്. ഇന്ത്യയിലെ മതപരമായ തത്വങ്ങളും ജീവിതരീതിയും തന്നെ ഒരുപാട് ആകർഷിച്ചിട്ടുണ്ട്. ഇതിന് പിന്നാലെയാണ് ജപ്പാനിലേക്ക് പോയി ഇക്കിഗായ് എഴുതിയത്. കോവിഡ് സമയത്ത് ഇന്ത്യയിലെ ഇരുന്നൂറിലധികം സർവ്വകലാശാലകൾ സന്ദർശിച്ചിരുന്നു. ഇന്ത്യയിലെ ആത്മീയതയെ അടിസ്ഥാനമാക്കി ഒരു പുസ്തകം എഴുതാമോ എന്ന് ആ സമയത്ത് തന്നോട് ഒരുപാട് പേർ ചോദിച്ചിട്ടുണ്ടെന്നും അദ്ദേഹം കൂട്ടിച്ചേർത്തു.
5000 വർഷത്തോളം പഴക്കമുള്ള ഇന്ത്യയുടെ പാരമ്പര്യത്തെ ചെറിയൊരു പുസ്തകത്തിലേക്ക് ചുരുക്കുക എന്നത് തന്നെ സംബന്ധിച്ചിടത്തോളം വളരെ വലിയൊരു വെല്ലുവിളിയായിരുന്നു. എങ്കിലും ഈ യാത്രയുശട ഭാഗമായി, ഹെക്ടർ ഗാർസിയയുമായി ചേർന്ന് ഒരു ചെറിയ പുസ്തകം എഴുതുകയായിരുന്നു. ‘ദി ഫോർ പുരുഷാർത്ഥാസ്’ തന്റെ ഈ പുസ്തകം, ഹിന്ദു തത്വ ശാസ്ത്രത്തിലെ ധർമം, അർത്ഥം, കാമം, മോക്ഷം എന്നീ നാല് പുരുഷാർത്ഥങ്ങളെ അടിസ്ഥാനമാക്കിയിട്ടുള്ളതാണെന്നും ഫ്രാൻസെസ്‌ക് മിറാലെസ് പറഞ്ഞു.
‘ഇക്കിഗായ്’ ഒരിക്കലും ഒരു തെറാപ്പി ടൂൾ ആയി എഴുതിയ പുസ്തകമല്ലെന്നും അദ്ദേഹം പറയുന്നു. ജോലിപരമായ കാര്യങ്ങളിലെല്ലാം സ്വയം സഹായിക്കുന്ന ഒരു പുസ്തകമാകും എന്ന ഉദ്ദേശത്തോടെയാണ് ‘ഇക്കിഗായ്’ താൻ എഴുതുന്നത്. എന്നാൽ, എഴുതി പൂർത്തിയായപ്പോൾ പുസ്തകം ഞാൻ വിചാരിച്ചതിലും ഉയരങ്ങളിലേക്ക് പോയി. ചിലപ്പോഴത് ഒരു നാടിന്റെ സംസ്‌കാരം വിളിച്ച് പറയുന്നത് കൊണ്ടായിരിക്കാം. ഇക്കിഗായ് ഇത്രയും വിജയിക്കുമെന്നും ഇതൊരു തരംഗമാകുമെന്നും ഒരിക്കലും പ്രതീക്ഷിച്ചില്ലെന്നും ഫ്രാൻസെസ്‌ക് മിറാലെസ് കൂട്ടിച്ചേർത്തു.
Discussion about this post