കോഴിക്കോട് : കോഴിക്കോട് കനത്ത കാറ്റിനെ തുടർന്ന് വ്യാപക നാശനഷ്ടങ്ങൾ. മഴയോടൊപ്പം അതിശക്തമായ കാറ്റാണ് കോഴിക്കോട് മേഖലയിൽ രാത്രിയോടെ ഉണ്ടായത്. കനത്ത കാറ്റിനെ തുടർന്ന് നിരവധി മരങ്ങൾ മറിഞ്ഞുവീണു. വിവിധ സ്ഥലങ്ങളിൽ ഗതാഗത തടസ്സങ്ങളും ഉണ്ടായി.
അരീക്കോട് മേഖലയിൽ മരങ്ങൾ റെയിൽവേ ട്രാക്കിലേക്ക് മറിഞ്ഞുവീണ് ട്രെയിൻ ഗതാഗതം തടസ്സപ്പെട്ടു. കല്ലായി-ഫറോക്ക് റെയില്വേ സ്റ്റേഷനുകള്ക്കിടയില് ആണ് മരങ്ങൾ വീണത്. മരങ്ങൾ വീണതിനെ തുടർന്ന് റെയിൽവേയുടെ വൈദ്യുതി ലൈനും പൊട്ടിവീണു.
മൂന്നു വലിയ മരങ്ങളും സമീപത്തെ വീടുകളുടെ ഷീറ്റുകളും ഉൾപ്പെടെയുള്ളവയാണ് റെയിൽവേ ലൈനിൽ വീണ് തടസ്സം സൃഷ്ടിച്ചത്. ട്രെയിൻ ഗതാഗതം തടസ്സപ്പെട്ടതിനെ തുടർന്ന് തിരുനെല്വേലി-ജാംനഗര് എക്സ്പ്രസ് ഒന്നരമണിക്കൂറോളമായി കല്ലായി സ്റ്റേഷന് മുന്പേ നിര്ത്തിയിട്ടിരിക്കുകയാണ്. മംഗളൂരു-തിരുവനന്തപുരം എക്സ്പ്രസ് കല്ലായിയിലും കണ്ണൂർ-ഷൊർണൂർ മെമു കോഴിക്കോട്ടും നിർത്തിയിട്ടിരിക്കുകയാണ്.
Discussion about this post