ഇന്ത്യ ഇതിലുമേറെ ചെയ്‌തേനെ, നാം സംയമനം പാലിക്കാൻ കാരണമുണ്ട്;ഏത് ശത്രുവിന്റെയും കവചം തുളച്ചുകയറാനുള്ള ശക്തിയുണ്ടെന്ന് തെളിയിച്ചു: രാജ്‌നാഥ് സിംഗ്

ഇന്ത്യയ്ക്ക് പാകിസ്താനിൽ ഇതിലുമേറെ നാശനഷ്ടങ്ങൾ വരുത്താൻ ശേഷിയുണ്ടായിട്ടും രാജ്യം സംയമനം പാലിച്ചതിന്റെ കാരണം വ്യക്തമാക്കി പ്രതിരോധമന്ത്രി രാജ്‌നാഥ് സിംഗ്. കൂടുതൽ നാശനഷ്ടങ്ങൾ വരുത്തിവയ്ക്കാൻ ശേഷിയുണ്ടായിട്ടും ഓപ്പറേഷൻ സിന്ദൂരിന് കീഴിലുള്ള സൈനിക പ്രതികാര നടപടിയിൽ ഇന്ത്യ ‘ശ്രദ്ധേയമായ സംയമനം’ പാലിച്ചുവെന്ന് അദ്ദേഹം പറഞ്ഞു. ഡൽഹിയിൽ നടന്ന കോൺഫെഡറേഷൻ ഓഫ് ഇന്ത്യൻ ഇൻഡസ്ട്രി (സിഐഐ)യുടെ ഉദ്ഘാടന പ്ലീനറിയിൽ സംസാരിക്കുകയായിരുന്നു കേന്ദ്രമന്ത്രി.

അതിർത്തി കടന്നുള്ള കൃത്യമായ ആക്രമണങ്ങളിൽ തീവ്രവാദ ലോഞ്ച് പാഡുകളും പാകിസ്താൻ വ്യോമതാവളങ്ങളും ആക്രമിച്ചതിനുശേഷം ഇന്ത്യക്ക് ആക്രമണം വർദ്ധിപ്പിക്കാമായിരുന്നു , പക്ഷേ അവർ അത് വേണ്ടെന്ന് വച്ചു.’ആദ്യം നമ്മൾ ഭീകരരുടെ ഒളിത്താവളങ്ങളും പിന്നീട് ശത്രുവിന്റെ വ്യോമതാവളങ്ങളും നശിപ്പിച്ചത് നിങ്ങൾ കണ്ടു. ‘നമുക്ക് ഇതിലും കൂടുതൽ കാര്യങ്ങൾ ചെയ്യാമായിരുന്നു, പക്ഷേ ശക്തിയോടൊപ്പം സംയമനവും വേണം. ലോകത്തിന് മുന്നിൽ ശക്തിയും ഏകോപനവും സംയോജിപ്പിച്ചതിന്റെ ശ്രദ്ധേയമായ ഒരു മാതൃകയാണ് നമ്മൾ അവതരിപ്പിച്ചതെന്ന് കേന്ദ്രമന്ത്രി ചൂണ്ടിക്കാട്ടി.

‘ഇനി മുതൽ, ചർച്ചകൾ നടക്കുമ്പോഴെല്ലാം അത് തീവ്രവാദത്തെയും പാക് അധിനിവേശ കശ്മീരിനെയും കുറിച്ച് മാത്രമായിരിക്കും, ‘മറ്റൊരു വിഷയത്തിലും പാകിസ്താനുമായി ചർച്ച ഉണ്ടാകില്ലെന്ന് അദ്ദേഹം വ്യക്തമാക്കി. പാക് അധിനിവേശ കശ്മീരിലെ ജനത ഇന്ത്യയിലേക്ക് മടങ്ങും. പാക് അധിനിവേശ കശ്മീരിലെ നിവാസികൾ ‘നമ്മുടെ സ്വന്തം ആളുകൾ’ ആണെന്നും ഭാവിയിൽ അവർ സ്വമേധയാ ഇന്ത്യയിൽ വീണ്ടും ചേരുമെന്ന് ആത്മവിശ്വാസം പ്രകടിപ്പിച്ചുവെന്നും അദ്ദേഹം കൂട്ടിച്ചേർത്തു.

‘പാക് അധിനിവേശ കശ്മീരിലെ ജനങ്ങൾ ഞങ്ങളുടെ സ്വന്തം ആളുകളാണ്. അവർ ഞങ്ങളുടെ കുടുംബത്തിന്റെ ഭാഗമാണ്. ഇന്ന് ഭൂമിശാസ്ത്രപരമായും രാഷ്ട്രീയമായും നമ്മളിൽ നിന്ന് വേർപിരിഞ്ഞിരിക്കുന്ന ഞങ്ങളുടെ സഹോദരങ്ങൾ ഒരു ദിവസം തീർച്ചയായും ഇന്ത്യയിലേക്ക് ആത്മാഭിമാനത്തോടെയും സ്വന്തം ഇഷ്ടപ്രകാരം തിരിച്ചുവരുമെന്ന് ഞങ്ങൾ ഉറച്ചു വിശ്വസിക്കുന്നുവെന്ന് കേന്ദ്രമന്ത്രി പറഞ്ഞു. പിഒകെയിലെ ഭൂരിഭാഗം ആളുകൾക്കും ഇന്ത്യയുമായി ആഴത്തിലുള്ള ബന്ധം ഉണ്ടെന്നും അവരിൽ ചുരുക്കം ചിലർ മാത്രമേ തെറ്റിദ്ധരിക്കപ്പെട്ടിട്ടുള്ളൂവെന്നും അദ്ദേഹം കൂട്ടിച്ചേർത്തു.

‘ഓപ്പറേഷൻ സിന്ദൂരിന്റെ സമയത്ത് നമ്മുടെ സ്വന്തം സംവിധാനങ്ങൾ ലോകത്തെ മുഴുവൻ ഞെട്ടിച്ചു, ഏത് ശത്രുവിന്റെയും കവചം തുളച്ചുകയറാനുള്ള ശക്തി നമുക്കുണ്ടെന്ന് തെളിയിച്ചു,’ സിംഗ് പറഞ്ഞു. ‘ഇന്ത്യയുടെ സുരക്ഷയ്ക്കും അഭിവൃദ്ധിക്കും മെയ്ക്ക് ഇൻ ഇന്ത്യ പ്രധാനമാണെന്ന് ഇന്ന് തെളിയിക്കപ്പെട്ടിട്ടുണ്ടെന്ന് അദ്ദേഹം കൂട്ടിച്ചേർത്തു.