പാലക്കാട് എംഎൽഎ രാഹുൽ മാങ്കൂട്ടത്തിനെതിരെ ഇപ്പോൾ കേസെടുത്തത് സിപിഎം-കോൺഗ്രസ് കൂട്ടുകെട്ടിന്റെ രാഷ്ട്രീയ തന്ത്രമെന്ന് ആരോപിച്ച് ബിജെപി സംസ്ഥാന അദ്ധ്യക്ഷൻ രാജീവ് ചന്ദ്രശേഖർ. രാഹുലിനെതിരെ കേസെടുത്തത് ശബരിമലയിലെ സ്വർണക്കൊള്ളയിൽ നിന്ന് പൊതുജന ശ്രദ്ധ തിരിക്കാൻ വേണ്ടിയുള്ള സിപിഎമ്മിന്റെ രാഷ്ട്രീയ തന്ത്രമാണെന്നും രാജീവ് ചന്ദ്രശേഖർ ചൂണ്ടിക്കാട്ടി.
രാഹുൽ മാങ്കൂട്ടത്തിലിനെതിരായ കേസ് ബി.ജെ.പി. എത്രയോ നാൾ മുൻപ് പറഞ്ഞിട്ടുള്ളതാണ്. എന്നാൽ, തിരഞ്ഞെടുപ്പിന് വെറും 10 ദിവസം ശേഷിക്കെ ഇന്നലെ കേസെടുത്തത് ഒരു രാഷ്ട്രീയ നീക്കമാണ്. ശബരിമലയിലെ സ്വർണക്കൊള്ള മറക്കാനും ശ്രദ്ധ തിരിക്കാനും വേണ്ടിയാണ് ഇപ്പോൾ ഈ കേസെടുത്തിരിക്കുന്നത്. ഇതിന് പിന്നിൽ സിപിഎം തന്ത്രമാണെന്ന് ബിജെപി സംസ്ഥാന അദ്ധ്യക്ഷൻ പറഞ്ഞു.
ശബരിമല കൊള്ള മറയ്ക്കാൻ സിപിഎമ്മും കോൺഗ്രസും ഒറ്റക്കെട്ടായി നീങ്ങുകയാണ്. ഇരുകൂട്ടരും ഒരുമിച്ച് നടത്തിയ കൊള്ളയാണ്. ഈ നീക്കത്തിലൂടെ സിപിഎം-കോൺഗ്രസ് ഇൻഡി അലൈൻസാണ് പുറത്ത് വരുന്നതെന്ന് രാജീവ് ചന്ദ്രശേഖർ ചൂണ്ടിക്കാട്ടി.
രാഹുൽ മാങ്കൂട്ടത്തിൽ റീൽ രാഷ്ട്രീയക്കാരനാണ്. ഉപതിരഞ്ഞെടുപ്പിന് മുമ്പ് തന്നെ രാഹുലിനെതിരെ ആരോപണം ഉണ്ടായിരുന്നു.എന്നിട്ടും പാലക്കാട് ജനങ്ങളുടെ തലയിൽ കെട്ടിവച്ചുവെന്നും അദ്ദേഹം കുറ്റപ്പെടുത്തി.
Discussion about this post