കാബൂൾ: അഫ്ഗാനിസ്ഥാന്റെ സാംസ്കാരിക പാരമ്പര്യത്തിന്റെ അവസാനത്തെ അടയാളങ്ങളിലൊന്നായ ചരിത്രപ്രസിദ്ധമായ സിനിമാ തിയേറ്ററും താലിബാൻ ഭരണകൂടം ഇടിച്ചുനിരത്തി. 1960 മുതൽ കാബൂളിന്റെ കലാ-സാംസ്കാരിക ജീവിതത്തിന്റെ ഹൃദയമിടിപ്പായിരുന്ന ഈ തിയേറ്റർ നിന്നിരുന്ന ഭൂമിയിൽ എട്ടു നിലകളുള്ള കൂറ്റൻ ഷോപ്പിങ് മാൾ നിർമ്മിക്കാനാണ് താലിബാന്റെ തീരുമാനം.
ഒരുകാലത്ത് ‘മധ്യേഷ്യയിലെ പാരീസ്’ എന്ന് വിശേഷിപ്പിക്കപ്പെട്ടിരുന്ന കാബൂളിന്റെ പ്രൗഢിയായിരുന്നു 1960-ൽ ആരംഭിച്ച ഈ തിയേറ്റർ. ബോളിവുഡ് ചിത്രങ്ങൾക്കും അഫ്ഗാൻ കലകൾക്കും വൻ ജനപ്രീതി നേടിക്കൊടുത്ത ഈ വേദി, വിവിധ ഭരണമാറ്റങ്ങൾക്കും ആഭ്യന്തര യുദ്ധങ്ങൾക്കും സാക്ഷ്യം വഹിച്ചിട്ടുണ്ട്. രണ്ട് തവണ താലിബാൻ രാജ്യം പിടിച്ചടക്കിയപ്പോഴും നിലനിന്ന ഈ സാംസ്കാരിക മുഖമാണ് ഇപ്പോൾ സാമ്പത്തിക നേട്ടങ്ങൾക്കായി ഭൂമി ഉപയോഗിക്കണമെന്ന വാദത്തോടെ തകർക്കപ്പെടുന്നത്.
2021-ൽ താലിബാൻ ഭരണം തിരിച്ചുപിടിച്ച ശേഷം ഈ തിയേറ്റർ പൂർണ്ണമായും അടച്ചുപൂട്ടിയിരുന്നില്ല. താലിബാന്റെ പ്രൊപ്പഗാൻഡ ചിത്രങ്ങൾ മാത്രം പ്രദർശിപ്പിക്കാനായി വിട്ടുകൊടുത്തിരുന്ന തിയേറ്റർ, കാബൂളിലെ അവസാന സിനിമാശാല കൂടിയായിരുന്നു. എന്നാൽ കലയേക്കാൾ സാമ്പത്തിക ലാഭത്തിന് മുൻഗണന നൽകിക്കൊണ്ട് അവിടെ മാൾ പണിയാൻ മുനിസിപ്പാലിറ്റി തീരുമാനിക്കുകയായിരുന്നു.
ഏകദേശം 35 ലക്ഷം ഡോളർ (ഏകദേശം 29 കോടി രൂപ) ചെലവിലാണ് ഇവിടെ എട്ടു നിലകളുള്ള ഷോപ്പിങ് മാൾ ഉയരുന്നത്. 300-ഓളം കടകൾക്ക് പുറമെ റസ്റ്റോറന്റുകളും പ്രാർത്ഥനയ്ക്കായി പള്ളിയും അടങ്ങുന്നതാണ് പുതിയ പദ്ധതിയെന്ന് കാബൂൾ മുനിസിപ്പാലിറ്റി അറിയിച്ചു.
ഒരു നഗരത്തിന്റെ ഓർമ്മകളെ മായ്ച്ചുകളഞ്ഞുകൊണ്ട് ഉയരുന്ന ഈ മാൾ, അഫ്ഗാൻ ജനതയുടെ കലാപരമായ സ്വാതന്ത്ര്യത്തിന് മേൽ വീണ അവസാനത്തെ ആണിയായാണ് വിലയിരുത്തപ്പെടുന്നത്.
Discussion about this post