ഡൽഹിയിൽ അഞ്ച് രൂപയ്ക്ക് വയറുനിറയെ ഭക്ഷണം; ‘അടൽ കാന്റീനുകൾ’ ജനപ്രിയമാകുന്നു

ന്യൂഡൽഹി: സാധാരണക്കാർക്കും ദിവസക്കൂലി തൊഴിലാളികൾക്കും വലിയ ആശ്വാസമായി ഡൽഹി സർക്കാരിന്റെ ‘അടൽ കാന്റീൻ’ പദ്ധതി. വെറും 5 രൂപയ്ക്ക് ഗുണമേന്മയുള്ള ഉച്ചഭക്ഷണവും അത്താഴവും നൽകുന്ന ഈ പദ്ധതിക്ക് നഗരത്തിൽ വൻ ജനപ്രീതിയാണ് ലഭിക്കുന്നത്.  മുൻ പ്രധാനമന്ത്രി അടൽ ബിഹാരി വാജ്‌പേയിയുടെ ജന്മവാർഷിക ദിനമായ 2025 ഡിസംബർ 25-നാണ് ഔദ്യോഗികമായി പ്രവർത്തനം ആരംഭിച്ചത്.

ഒരു പ്ലേറ്റ് ഭക്ഷണത്തിന് വെറും 5 രൂപ മാത്രമാണ് ഈടാക്കുന്നത്. ഇതിലൂടെ പാവപ്പെട്ടവർക്കും സാധാരണക്കാർക്കും അന്തസ്സോടെ വിശപ്പടക്കാൻ സാധിക്കുന്നു. പരിപ്പ് കറി (ദാൽ), ചോറ്, റൊട്ടി, സീസണൽ പച്ചക്കറികൾ, അച്ചാർ എന്നിവയടങ്ങുന്ന പോഷകസമ്പന്നമായ താലിയാണ് വിളമ്പുന്നത്.

ഡൽഹിയിലുടനീളമുള്ള ചേരി പ്രദേശങ്ങളും വ്യാവസായിക മേഖലകളും കേന്ദ്രീകരിച്ച് 100 കാന്റീനുകളാണ് സർക്കാർ ലക്ഷ്യമിടുന്നത്. നിലവിൽ 45 കേന്ദ്രങ്ങൾ പ്രവർത്തനമാരംഭിച്ചു കഴിഞ്ഞു. ഉച്ചഭക്ഷണം രാവിലെ 11:30 മുതൽ 2:00 വരെയും, രാത്രി ഭക്ഷണം വൈകുന്നേരം 6:30 മുതൽ 9:00 വരെയുമാണ് ലഭ്യമാകുന്നത്.

ഡിജിറ്റൽ ടോക്കൺ സംവിധാനം വഴിയാണ് ഭക്ഷണ വിതരണം നടക്കുന്നത്. കൃത്യമായ നിരീക്ഷണത്തിനായി എല്ലാ കാന്റീനുകളിലും സിസിടിവി ക്യാമറകളും സ്ഥാപിച്ചിട്ടുണ്ട്. ഭക്ഷ്യസുരക്ഷ ഉറപ്പാക്കുന്നതിനൊപ്പം സാധാരണക്കാരുടെ ആത്മാഭിമാനം സംരക്ഷിക്കുക കൂടിയാണ് ഈ പദ്ധതിയെന്ന് മുഖ്യമന്ത്രി രേഖാ ഗുപ്ത വ്യക്തമാക്കി. ഓരോ കാന്റീനിലും പ്രതിദിനം ശരാശരി 1000 പേർക്ക് ഭക്ഷണം നൽകാനാണ് ലക്ഷ്യമിടുന്നത്. 104.24 കോടി രൂപയാണ് ഈ ക്ഷേമപദ്ധതിക്കായി സർക്കാർ വകയിരുത്തിയിരിക്കുന്നത്. തിരക്കേറിയ മെട്രോ നഗരത്തിൽ കുറഞ്ഞ ചെലവിൽ പോഷകാഹാരം ലഭ്യമാകുന്നത് ദിവസക്കൂലിക്കാർക്കും അന്തർസംസ്ഥാന തൊഴിലാളികൾക്കും വലിയൊരു അനുഗ്രഹമായി മാറിയിരിക്കുകയാണ്.