മറുനാടൻ മലയാളി എഡിറ്റർ ഷാജൻ സ്കറിയയെ അറസ്റ്റ് ചെയ്യുന്നതിൽ കാലതാമസം വരുത്തുന്ന കൊച്ചി പോലീസിനെതിരെ എറണാകുളം പ്രിൻസിപ്പൽ സെഷൻസ് കോടതിയുടെ രൂക്ഷവിമർശനം. നിരന്തരം കുറ്റകൃത്യങ്ങളിൽ ഏർപ്പെടുന്ന ഒരാളെ പിടികൂടാൻ പോലീസിന് എന്താണ് തടസ്സമെന്ന് കോടതി ചോദിച്ചു. ഡോക്ടറുടെ ഫോൺ ചോർത്തിയെന്ന കേസിൽ ഷാജൻ സ്കറിയ നൽകിയ മുൻകൂർ ജാമ്യാപേക്ഷ പരിഗണിക്കവെയാണ് കോടതി പോലീസിനെ പ്രതിക്കൂട്ടിലാക്കിയത്.
ഷാജൻ സ്കറിയ ഒളിവിലാണെന്ന പോലീസിന്റെ സ്ഥിരം പല്ലവിയെ കോടതി പരിഹസിച്ചു. പ്രതി ഒളിവിലാണെന്ന് പറയുമ്പോഴും എല്ലാ ദിവസവും യൂട്യൂബിലൂടെ അയാൾ വീഡിയോകൾ പോസ്റ്റ് ചെയ്യുന്നുണ്ടല്ലോ എന്ന് കോടതി ചൂണ്ടിക്കാട്ടി. ഇത്രയധികം പ്രശ്നക്കാരനായ ഒരാൾക്കെതിരെ ജാമ്യമില്ലാ വകുപ്പുകൾ പ്രകാരം കേസെടുത്തിട്ടും അറസ്റ്റ് രേഖപ്പെടുത്താത്തത് എന്തുകൊണ്ടാണെന്ന് കോടതി ആരാഞ്ഞു. പോലീസിന്റെ ഭാഗത്തുനിന്നുള്ള ഇത്തരം വീഴ്ചകൾ കുറ്റവാളികൾക്ക് വളം വെച്ചുകൊടുക്കുന്നതാണെന്ന സൂചനയും കോടതി നൽകി.
കടവന്ത്ര പോലീസാണ് ഫോൺ ചോർത്തൽ പരാതിയിൽ ഷാജൻ സ്കറിയയ്ക്കെതിരെ കേസെടുത്തത്. ഇതിന് മുൻപും പലതവണ സമാനമായ പരാതികളും കോടതിയുടെ വിമർശനങ്ങളും നേരിട്ടിട്ടുള്ള ഷാജൻ സ്കറിയയ്ക്ക് പോലീസിനുള്ളിലെ ചിലരുടെ സഹായം ലഭിക്കുന്നുണ്ടോ എന്ന സംശയം നേരത്തെ തന്നെ ശക്തമായിരുന്നു.
Discussion about this post