ഭാരതീയ സംസ്കാരത്തിന്റെയും സനാതന ധർമ്മത്തിന്റെയും പവിത്രത വിദേശമണ്ണിലും കാത്തുസൂക്ഷിച്ചുകൊണ്ട് യു കെയിലെ ന്യൂകാസിലിൽ ആറ്റുകാൽ പൊങ്കാല മഹോത്സവം ഭക്തിസാന്ദ്രമായി കൊണ്ടാടി. ന്യൂകാസിൽ മലയാളി ഹിന്ദു സമാജത്തിന്റെയും നോർത്ത് ഈസ്റ്റ് കേരള ഹിന്ദു സമാജത്തിന്റെയും (യുകെ) സംയുക്താഭിമുഖ്യത്തിൽ ഇക്കഴിഞ്ഞ എട്ടാം തീയതി ഞായറാഴ്ചയാണ് ന്യൂകാസിൽ സേജ് ഹിൽ കമ്മ്യൂണിറ്റി ഹാളിൽ വെച്ച് പൊങ്കാല സംഘടിപ്പിച്ചത്. ലോകത്തിന്റെ ഏത് കോണിലായാലും സ്വന്തം വേരുകളെയും ആചാരങ്ങളെയും നെഞ്ചിലേറ്റുന്ന പ്രവാസി ഭാരതീയരുടെ കരുത്താണ് ഈ ആഘോഷത്തിലൂടെ ഒരിക്കൽ കൂടി തെളിയിക്കപ്പെട്ടത്. മാവേലിക്കര കണ്ടിയൂർ നീലമന ഇല്ലം രാഹുൽ ശങ്കരൻ നമ്പൂതിരിയുടെ മുഖ്യകാർമ്മികത്വത്തിൽ നടന്ന ചടങ്ങുകളിൽ നൂറുകണക്കിന് ഭക്തജനങ്ങളാണ് പങ്കെടുത്തത്.
അന്നേദിവസം രാവിലെ 10 മണിക്ക് അനിൽ ശിവാനന്ദൻ, സോമൻ നാരായണൻ എന്നിവർ ചേർന്ന് ഭക്തിനിർഭരമായ അന്തരീക്ഷത്തിൽ പതാക ഉയർത്തിയതോടെയാണ് മഹോത്സവത്തിന് തുടക്കമായത്. തുടർന്ന് നടന്ന പൊങ്കാല സമർപ്പണ ചടങ്ങിൽ, 11.30 ഓടെ പണ്ടാര അടുപ്പിൽ നിന്നും പകർന്ന ദീപം ഓരോ ഭക്തരുടെയും പൊങ്കാല അടുപ്പുകളിലേക്ക് പകർന്നു. മുപ്പതിലധികം പൊങ്കാല സമർപ്പണങ്ങളാണ് ഇത്തവണ നടന്നത്. നാമജപ ഘോഷങ്ങളാൽ മുഖരിതമായ അന്തരീക്ഷത്തിൽ, തികച്ചും ആചാരനിഷ്ഠയോടെ നടന്ന ഈ ചടങ്ങ് വിദേശ രാജ്യങ്ങളിൽ വളരുന്ന പുതിയ തലമുറയ്ക്ക് ഭാരതീയ സംസ്കാരത്തിന്റെ മഹത്വം മനസ്സിലാക്കിക്കൊടുക്കുന്ന ഒന്നായി മാറി. പാരമ്പര്യമായി പിന്തുടരുന്ന എല്ലാവിധ ആചാരാനുഷ്ഠാനങ്ങളും പാലിച്ചുകൊണ്ട് ദേവീചൈതന്യത്തിൽ അലിഞ്ഞുചേർന്ന നിമിഷങ്ങളായിരുന്നു സേജ് ഹിൽ കമ്മ്യൂണിറ്റി ഹാളിൽ സാക്ഷ്യം വഹിച്ചത്.
ബ്രിട്ടീഷ് ജീവിതസാഹചര്യങ്ങൾക്കിടയിലും സ്വന്തം ധർമ്മത്തെ മുറുകെപ്പിടിച്ച് ഇത്രയും വിപുലമായ രീതിയിൽ പൊങ്കാല സംഘടിപ്പിച്ചത് ഏറെ പ്രശംസനീയമാണ്. പൊങ്കാല മഹോത്സവം വൻ വിജയമാക്കാൻ സഹകരിച്ചവർക്കും, നേരിട്ട് പങ്കെടുത്ത ഭക്തജനങ്ങൾക്കും, ദൂരക്കൂടുതൽ മൂലമോ മറ്റ് കാരണങ്ങളാലോ എത്താൻ കഴിയാതിരുന്ന വിശ്വാസികൾക്കും നോർത്ത് ഈസ്റ്റ് കേരള ഹിന്ദു സമാജവും ന്യൂകാസിൽ മലയാളി ഹിന്ദു സമാജവും നന്ദിയും സ്നേഹവും അറിയിച്ചു. ലണ്ടൻ ഉൾപ്പെടെയുള്ള യുകെയുടെ വിവിധ ഭാഗങ്ങളിൽ നിന്നും ഭക്തർ ഈ പുണ്യകർമ്മത്തിൽ പങ്കാളികളാകാൻ എത്തിയിരുന്നു. ഭാരതീയ ദേശീയതയുടെയും ഹൈന്ദവ പാരമ്പര്യത്തിന്റെയും പ്രഭാവം കടൽ കടന്നും പ്രസരിക്കുകയാണെന്നതിന്റെ ഉത്തമ ഉദാഹരണമായി ഈ പൊങ്കാല മഹോത്സവം മാറി.
