ഇന്ത്യ കരുതിയിരുന്നോ, ഈ പോക്ക് പോയാൽ പിടിച്ചാൽ കിട്ടില്ല! ലോകകപ്പിന് മുമ്പ് ദക്ഷിണാഫ്രിക്കയുടെ ‘വാണിംഗ് ഷോട്ട്’

2026 ടി20 ലോകകപ്പിന് ദിവസങ്ങൾ മാത്രം ബാക്കിനിൽക്കെ, വെസ്റ്റ് ഇൻഡീസിനെതിരായ ടി20 പരമ്പരയിൽ കൂറ്റൻ സ്കോർ അടിച്ചുകുതറി ദക്ഷിണാഫ്രിക്ക കരുത്തറിയിക്കുന്നു. വെസ്റ്റ് ഇൻഡീസ് ഉയർത്തിയ 222 റൺസ് എന്ന കൂറ്റൻ ലക്ഷ്യം വെറും 17.3 ഓവറിൽ മൂന്ന് വിക്കറ്റ് മാത്രം നഷ്ടപ്പെടുത്തി ദക്ഷിണാഫ്രിക്ക മറികടന്നു.

തന്റെ നൂറാം അന്താരാഷ്ട്ര ടി20 മത്സരത്തിൽ കരിയറിലെ ഏറ്റവും മികച്ച പ്രകടനവുമായി ക്വിന്റൺ ഡി കോക്ക് നിറഞ്ഞാടിയപ്പോൾ വിൻഡീസ് പട നിഷ്പ്രഭമായി. വെറും 49 പന്തിൽ നിന്ന് 6 ഫോറും 10 സിക്സും ഉൾപ്പെടെ 115 റൺസാണ് ഡി കോക്ക് അടിച്ചുകൂട്ടിയത്. വെറും 43 പന്തിലാണ് താരം തന്റെ സെഞ്ചുറി പൂർത്തിയാക്കിയത്.

ഓപ്പണർ ഡി കോക്കിന് മികച്ച പിന്തുണയുമായി റയാൻ റിക്കൽട്ടൻ പുറത്താകാതെ 77 റൺസ് (36 പന്ത്) നേടി. ഇരുവരും ചേർന്ന് രണ്ടാം വിക്കറ്റിൽ 11.5 ഓവറിൽ 162 റൺസാണ് വാരിക്കൂട്ടിയത്. നേരത്തെ ആദ്യം ബാറ്റ് ചെയ്ത വെസ്റ്റ് ഇൻഡീസ് ഷിമ്രോൺ ഹെറ്റ്‌മെയറുടെയും (75) ഷെർഫെയ്ൻ റൂഥർഫോർഡിന്റെയും (57*) ബാറ്റിംഗ് കരുത്തിൽ 221 റൺസ് എന്ന മികച്ച സ്കോർ പടുത്തുയർത്തിയിരുന്നു.

ഫെബ്രുവരി 7-ന് ആരംഭിക്കുന്ന ടി20 ലോകകപ്പിന് മുന്നോടിയായി വലിയ ആത്മവിശ്വാസമാണ് ഈ വിജയം ദക്ഷിണാഫ്രിക്കയ്ക്ക് നൽകുന്നത്. ലോകകപ്പിന് മുന്നോടിയായുള്ള ഏക ഔദ്യോഗിക പരിശീലന മത്സരത്തിൽ ഫെബ്രുവരി 4-ന് ദക്ഷിണാഫ്രിക്ക ഇന്ത്യയെ നേരിടും. 2024 ടി20 ലോകകപ്പ് ഫൈനലിൽ ഇന്ത്യ തോൽപ്പിച്ച അതേ ടീമായ ദക്ഷിണാഫ്രിക്കയെ തന്നെ പരിശീലന മത്സരത്തിലും നേരിടുന്നു എന്നത് ശ്രദ്ധേയമാണ്.