വീട് പൂട്ടി യാത്ര പോകാറുണ്ടോ? ഇനി പേടി വേണ്ട, കാവലിന് പോലീസ് എത്തും! നിങ്ങളുടെ ഫോണിൽ ഈ ഒരു ആപ്പ് ഉണ്ടോ?

അവധിക്കാലം ആഘോഷിക്കാനോ ബന്ധുവീടുകളിലേക്കോ വീട് പൂട്ടി യാത്ര പോകുന്നവർക്ക് ആശ്വാസവാർത്തയുമായി കേരള പോലീസ്.  വീട് അടച്ചിട്ടു പോകുന്ന സമയങ്ങളിൽ മോഷണഭീതിയൊഴിയാൻ പോലീസിൻ്റെ ഔദ്യോഗിക മൊബൈൽ ആപ്പായ ‘പോൽ ആപ്പ്’ (Pol-App) വഴി സുരക്ഷാ സഹായം തേടാം. ആപ്പിലെ ‘ലോക്ക്ഡ് ഹൗസ് ഇൻഫർമേഷൻ’ (Locked House Information) എന്ന ഫീച്ചർ വഴിയാണ് ഈ സേവനം ലഭ്യമാകുക. വീട് പൂട്ടിപ്പോകുന്ന കാര്യം മുൻകൂട്ടി പോലീസിനെ അറിയിച്ചാൽ, ആ ഭാഗങ്ങളിൽ പോലീസ് പ്രത്യേക പട്രോളിംഗും നിരീക്ഷണവും ഉറപ്പാക്കും.

പരമാവധി 14 ദിവസം വരെയാണ് ഇത്തരത്തിൽ പോലീസിൻ്റെ നിരീക്ഷണം ലഭിക്കുക. യാത്ര പോകുന്ന ദിവസം, വീട് സ്ഥിതി ചെയ്യുന്ന കൃത്യമായ ലൊക്കേഷൻ, വീട്ടുപേര്, ആ സമയത്ത് ബന്ധപ്പെടാൻ സാധിക്കുന്ന സമീപത്തുള്ള ബന്ധുക്കളുടെയോ അയൽവാസികളുടെയോ പേരും ഫോൺ നമ്പറും എന്നിവ ആപ്പിൽ രേഖപ്പെടുത്തണം. ഇങ്ങനെ വിവരം നൽകുന്നതോടെ നിശ്ചിത ദിവസങ്ങളിൽ ആ വീടും പരിസരവും പോലീസിന്റെ റഡാറിലായിരിക്കും. രാത്രികാല പട്രോളിംഗിന് പുറമെ പ്രത്യേക പരിശോധനകളും പോലീസ് ഈ മേഖലകളിൽ നടത്തും.

ഗൂഗിൾ പ്ലേ സ്റ്റോറിൽ നിന്നും ആപ്പിൾ ആപ്പ് സ്റ്റോറിൽ നിന്നും ‘പോൽ ആപ്പ്’ ഡൗൺലോഡ് ചെയ്യാം. മോഷണം തടയാൻ ജനങ്ങൾ ഈ സേവനം പരമാവധി പ്രയോജനപ്പെടുത്തണമെന്ന് പോലീസ് നിർദ്ദേശിച്ചു. വീട് പൂട്ടിപ്പോകുന്ന കാര്യം ആപ്പിലൂടെ അറിയിക്കുമ്പോൾ അത് അതത് പോലീസ് സ്റ്റേഷനുകളിൽ ഉടനടി റിപ്പോർട്ട് ചെയ്യപ്പെടുകയും ഡ്യൂട്ടിയിലുള്ള ഉദ്യോഗസ്ഥർക്ക് കൃത്യമായ വിവരം കൈമാറുകയും ചെയ്യും. സാധാരണക്കാരുടെ സുരക്ഷ ഉറപ്പാക്കാൻ ഡിജിറ്റൽ സംവിധാനങ്ങളെ ഫലപ്രദമായി ഉപയോഗിക്കുന്ന കേരള പോലീസിന്റെ ഈ നീക്കം വലിയ ജനപിന്തുണയാണ് നേടുന്നത്. ഇതോടെ ദൂരയാത്രകൾ പോകുന്നവർക്ക് വീടിന്റെ സുരക്ഷയെക്കുറിച്ച് ആകുലപ്പെടാതെ സമാധാനമായി യാത്ര തുടരാം.