ടി20 ലോകകപ്പിലെ ഇന്ത്യ-പാകിസ്ഥാൻ മഹാപോരാട്ടത്തിന് കൊളംബോയിൽ പിച്ചൊരുങ്ങുമ്പോൾ, ആരാധകർക്ക് ഏറ്റവും സന്തോഷം നൽകുന്ന വാർത്തയുമായി ഇന്ത്യൻ നായകൻ സൂര്യകുമാർ യാദവ് എത്തിയിരിക്കുകയാണ്. അസുഖം മൂലം കഴിഞ്ഞ മത്സരം നഷ്ടമായ ഇന്ത്യൻ ഓപ്പണർ അഭിഷേക് ശർമ്മ പാകിസ്ഥാനെതിരെ കളിക്കുമെന്ന് സൂര്യകുമാർ സ്ഥിരീകരിച്ചു.
വാർത്താ സമ്മേളനത്തിൽ പാക് നായകൻ സൽമാൻ അലി ആഗ നടത്തിയ ഒരു പരാമർശത്തിന് സൂര്യകുമാർ നൽകിയ മറുപടിയാണ് ഇപ്പോൾ ക്രിക്കറ്റ് ലോകത്ത് വൈറലായിരിക്കുന്നത്. അഭിഷേക് ശർമ്മ കളിക്കുമെന്ന് ഏകദേശം ഉറപ്പായതോടെ ഇന്ത്യൻ ബാറ്റിംഗ് നിര കൂടുതൽ കരുത്താർജ്ജിക്കും.
ഇന്ത്യയുടെ ഏറ്റവും മികച്ച ടീമിനെതിരെ കളിക്കാനാണ് തങ്ങൾ ആഗ്രഹിക്കുന്നതെന്ന് സൽമാൻ അലി ആഗ പറഞ്ഞിരുന്നു. “അഭിഷേക് ശർമ്മ മികച്ച കളിക്കാരനാണ്. അദ്ദേഹം സുഖം പ്രാപിച്ച് നാളത്തെ മത്സരത്തിൽ കളിക്കുമെന്ന് ഞാൻ പ്രതീക്ഷിക്കുന്നു. കാരണം ഇന്ത്യയുടെ ബെസ്റ്റ് ടീമിനെ തോൽപ്പിക്കാനാണ് ഞങ്ങൾക്കിഷ്ടം,” എന്നായിരുന്നു ആഗയുടെ വാക്കുകൾ.
പാക് നായകന്റെ ഈ പ്രസ്താവനയെക്കുറിച്ച് ചോദിച്ചപ്പോൾ തന്റെ സ്വതസിദ്ധമായ ശൈലിയിൽ പുഞ്ചിരിച്ചുകൊണ്ട് സൂര്യകുമാർ മറുപടി നൽകി: “പാകിസ്ഥാന് അഭിഷേക് ശർമ്മ കളിക്കണമെന്നാണെങ്കിൽ, അദ്ദേഹം കളിക്കും”. താരം പൂർണ്ണ കായികക്ഷമത വീണ്ടെടുത്തതായും നാളത്തെ പോരാട്ടത്തിൽ ഓപ്പണറായി ഇറങ്ങുമെന്നും സൂര്യകുമാർ ഇതോടെ പരോക്ഷമായി സ്ഥിരീകരിച്ചു.
അഭിഷേക് ശർമ്മ തിരിച്ചെത്തുന്നതോടെ കഴിഞ്ഞ മത്സരത്തിൽ ഓപ്പണറായ മലയാളി താരം സഞ്ജു സാംസൺ പ്ലേയിംഗ് ഇലവനിൽ നിന്ന് പുറത്തുപോകാനാണ് സാധ്യത. നിലവിൽ ടി20 റാങ്കിംഗിൽ ഒന്നാം സ്ഥാനത്തുള്ള അഭിഷേകിന്റെ സാന്നിധ്യം കൊളംബോയിലെ സ്പിൻ പിച്ചിൽ ഇന്ത്യയ്ക്ക് വലിയ മുൻതൂക്കം നൽകും. സ്പിൻ ബൗളിംഗിനെ കടന്നാക്രമിക്കാനുള്ള അഭിഷേകിന്റെ കഴിവ് പാക് സ്പിന്നർമാരായ ഉസ്മാൻ താരിക്കിനും സൽമാൻ ആഗയ്ക്കും വെല്ലുവിളിയാകും.
Discussion about this post