ബാംഗ്ലൂരിലെ എൻജിനീയറിങ് ബിരുദധാരിയായ നന്ദ (രേവതി) തന്റെ സുഹൃത്ത് വിമലയ്ക്കൊപ്പം താമസിക്കുമ്പോഴാണ് ആ വിചിത്രമായ കാര്യങ്ങൾ തുടങ്ങുന്നത്. ഒരിക്കൽ അപരിചിതനായ ഒരാൾ നന്ദയുടെ ഫോട്ടോകൾ അവളുടെ വാതിൽപ്പടിക്കൽ കൊണ്ടിടുന്നു. ആദ്യം അവഗണിച്ചെങ്കിലും, അവൾ നടന്നുപോകുന്നതും റെസ്റ്റോറന്റിൽ ഇരിക്കുന്നതുമായ ചിത്രങ്ങൾ വീണ്ടും ലഭിച്ചതോടെ താൻ ആരോ പിന്തുടരുന്നുണ്ടെന്ന സത്യം അവൾ തിരിച്ചറിയുന്നു.
രഘുനാഥ് എന്നും മോഹൻ തരകൻ എന്നും പേരുമാറ്റി തന്നെ വട്ടംകറക്കിയ ആ നിഗൂഢ മനുഷ്യൻ ഒടുവിൽ ഒരു പാർട്ടിയിൽ വെച്ച് നന്ദയ്ക്ക് മുന്നിലെത്തുന്നു. അവൻ നരേന്ദ്രൻ (മോഹൻലാൽ) ആയിരുന്നു. എം.ഐ.ടി ബിരുദധാരിയും മിടുക്കനുമായ ആർക്കിടെക്റ്റ്. തന്നെ പറ്റിച്ച നരേന്ദ്രനെ നന്ദ പരസ്യമായി തല്ലി ഇറങ്ങിപ്പോകുന്നു. എന്നാൽ, ആ വെറുപ്പ് പിന്നീട് അതിതീവ്രമായ പ്രണയമായി മാറി. ശേഷം ഇരുവരും വിവാഹം കഴിക്കാൻ തീരുമാനിക്കുന്നു.
പ്രണയത്തിന്റെ കൊടുമുടിയിൽ നിൽക്കുമ്പോഴാണ് വിധി അതിന്റെ വില്ലൻ വേഷം അണിയുന്നത്. അപ്രതീക്ഷിതമായി ഒരു കെട്ടിടത്തിന് മുകളിൽ നിന്ന് വീണ് നരേന്ദ്രൻ മരിക്കുന്നു. സന്തോഷത്തിന്റെ നിറങ്ങളിലായിരുന്ന നന്ദയുടെ ലോകം ഇരുളടയുന്നു. നരേന്ദ്രന്റെ നാട്ടിലെത്തുന്ന നന്ദ അവിടെവെച്ച് അയാളുടെ ഇരട്ട സഹോദരനും നരേന്ദ്രന്റെ നേരെ വിപരീതമായ, ഒരു സാധു സ്വഭാവത്തിന്റെ ഉടമായ ഉണ്ണിയെ കാണുന്നു. ആദ്യത്തെ അങ്കലാപ്പിനൊടുവിൽ സത്യം തിരിച്ചറിഞ്ഞ നന്ദ പതുക്കെ ആ വീടിന്റെ ഭാഗമാകുന്നു.
ശേഷം എന്താണ് ഇവരുടെ ജീവിതത്തിൽ സംഭവിക്കുന്നതെന്നാണ് സിബി മലയിൽ സംവിധാനം ചെയ്ത മായാമയൂരം പറഞ്ഞ കഥ. അടിച്ചുപൊളി ജീവിതം ആഘോഷിക്കുന്ന നരേന്ദ്രന്റെ ലൈഫ് സ്റ്റൈൽ അതിമനോഹരമായി പകർത്തിയ മോഹൻലാൽ അതെ മികവിൽ തന്നെ സാധുവായ ഉണ്ണിയുടെ ജീവിത രീതിയും നമുക്ക് കാണിച്ചു തന്നു. ആദ്യമായി മോഹൻലാലും രേവതിയും കാണുന്ന സീനിൽ ഡയറക്ടർ ഒരുക്കിയ ആശയക്കുഴപ്പം ഈ സിനിമയിലെ ഒരു വലിയ ട്വിസ്റ്റ് ആയിട്ടുണ്ട്.
ആ സീൻ ഇനി കാണുമ്പോൾ ഒന്ന് ശ്രദ്ധിച്ചോ ഒരു സിബി മലയിൽ ബ്രില്ലിയൻസ് കാണാം.
Discussion about this post