ലോകത്തെ ആദ്യ ‘ട്രില്യണയർ’ പിറക്കുന്നു! ആസ്തി 850 ബില്യൺ ഡോളർ; സക്കർബർഗും ലാറി പേജും ബ്രൈനും ഒന്നിച്ചു വന്നാലും  മസ്കിൻ്റെ തട്ട് താണിരിക്കും

ലോക സമ്പന്നരുടെ പട്ടികയിലെ എല്ലാ റെക്കോർഡുകളും തകർത്തെറിഞ്ഞ് ഇലോൺ മസ്ക് ചരിത്രത്തിലേക്ക് ലോകത്തെ ആദ്യത്തെ ട്രില്യണയർ (ലക്ഷം കോടി ഡോളർ ആസ്തിയുള്ള വ്യക്തി) എന്ന പദവിയിലേക്ക് മസ്ക് എത്തുമെന്നാണ് ഏറ്റവും പുതിയ കണക്കുകൾ സൂചിപ്പിക്കുന്നത്. നിലവിൽ 850 ബില്യൺ ഡോളറാണ് മസ്കിന്റെ ആസ്തി. 2026 ഫെബ്രുവരിയിൽ 800 ബില്യൺ ഡോളർ പിന്നിടുന്ന ആദ്യ വ്യക്തിയായി മസ്ക് മാറിയിരുന്നു. ലോകത്തെ മറ്റ് പ്രമുഖ സമ്പന്നരായ ലാറി പേജ് ($251 ബില്യൺ), സെർജി ബ്രിൻ ($231 ബില്യൺ), മാർക്ക് സക്കർബർഗ് ($219 ബില്യൺ) എന്നിവരുടെ ആകെ ആസ്തിയെക്കാൾ കൂടുതലാണ് ഇപ്പോൾ മസ്കിന്റെ മാത്രം സമ്പാദ്യം.

മസ്കിന്റെ ആസ്തി ഇത്ര വേഗത്തിൽ കുതിച്ചുയരാൻ പ്രധാന കാരണം കഴിഞ്ഞ ആഴ്ച നടന്ന സ്പേസ് എക്സ് – xAI ലയനമാണ്. 1.25 ട്രില്യൺ ഡോളർ മൂല്യമുള്ള പുതിയ കമ്പനിയുടെ 43 ശതമാനം ഓഹരികളും മസ്കിന്റെ പക്കലാണ്. ഈ ഒരു ലയനത്തിലൂടെ മാത്രം 530 ബില്യൺ ഡോളറിലധികം മൂല്യം അദ്ദേഹത്തിന്റെ ആസ്തിയിലേക്ക് കൂട്ടിച്ചേർക്കപ്പെട്ടു. അതായത് മസ്കിന്റെ ആകെ സമ്പാദ്യത്തിന്റെ മൂന്നിൽ രണ്ടും ഇപ്പോൾ സ്പേസ് എക്സ് എന്ന ബഹിരാകാശ കമ്പനിയിൽ നിന്നാണ്. ഇതിന് പുറമെ ടെസ്‌ലയിലെ 12 ശതമാനം ഓഹരികളും ($178 ബില്യൺ) അദ്ദേഹത്തിന്റെ കരുത്തായി നിലനിൽക്കുന്നു. ടെസ്‌ല ഓഹരിയുടമകൾ അംഗീകരിച്ച വമ്പൻ ശമ്പള പാക്കേജ് കൂടി ലഭിക്കുന്നതോടെ മസ്കിന്റെ ആസ്തി 1.5 ട്രില്യൺ ഡോളറിലേക്ക് എത്താനാണ് സാധ്യത.

സമ്പത്തിന്റെ കാര്യത്തിൽ മുന്നേറുമ്പോഴും മസ്കിന്റെ ആർട്ടിഫിഷ്യൽ ഇന്റലിജൻസ് കമ്പനിയായ xAI വലിയ നിയമക്കുരുക്കുകളെയും നേരിടുന്നുണ്ട്. xAI-യുടെ ഇമേജ് ജനറേറ്ററായ ‘ഗ്രോക്ക്’ (Grok) ഉപയോഗിച്ച് സ്ത്രീകളുടെയും കുട്ടികളുടെയും വ്യാജ നഗ്നചിത്രങ്ങൾ (Deepfakes) നിർമ്മിക്കുന്നു എന്ന ആരോപണത്തിൽ അമേരിക്ക, യൂറോപ്പ്, ഏഷ്യ, ഓസ്‌ട്രേലിയ എന്നിവിടങ്ങളിൽ അന്വേഷണം നടക്കുകയാണ്. ഈ വിവാദങ്ങൾ എക്സ് പ്ലാറ്റ്‌ഫോമിന് വലിയ തിരിച്ചടിയാകുന്നുണ്ടെങ്കിലും മസ്കിന്റെ സാമ്പത്തിക കുതിപ്പിനെ ഇതൊന്നും ബാധിക്കുന്നില്ലെന്നാണ് ട്രേഡിംഗ് പ്ലാറ്റ്‌ഫോമുകൾ നൽകുന്ന സൂചന.

പ്രവചന വിപണി പ്ലാറ്റ്‌ഫോമായ ‘കൽഷി’ (Kalshi) പുറത്തുവിട്ട കണക്കുകൾ പ്രകാരം 75 ശതമാനം വ്യാപാരികളും മസ്ക് ഈ വർഷം തന്നെ ട്രില്യണയർ ആകുമെന്ന് വിശ്വസിക്കുന്നു. സ്പേസ് എക്സിന്റെ ഐപിഒ (IPO) കൂടി വിപണിയിലെത്തിയാൽ മസ്കിന്റെ ആസ്തി ഊഹിക്കാവുന്നതിലും അപ്പുറത്തേക്ക് വളരും. ലോകത്തിലെ ഏറ്റവും സ്വാധീനമുള്ള വ്യക്തിയായി മസ്ക് മാറുന്ന കാഴ്ചയാണ് സാമ്പത്തിക ലോകം ഇപ്പോൾ ഉറ്റുനോക്കുന്നത്.