നമ്മൾ സ്ക്രീനിൽ കാണുന്ന ഡിജിറ്റൽ ലോകം ഇത്ര സുഗമമായി പ്രവർത്തിക്കുന്നത് എങ്ങനെയെന്ന് എപ്പോഴെങ്കിലും ചിന്തിച്ചിട്ടുണ്ടോ? കൂറ്റൻ ഗോഡൗണുകളിൽ രാപ്പകൽ പ്രവർത്തിക്കുന്ന ലക്ഷക്കണക്കിന് സെർവറുകളാണ് ഇതിന് പിന്നിൽ. എന്നാൽ ഈ സെർവറുകളെ തണുപ്പിക്കാൻ ഗൂഗിൾ മാത്രം ഒരു വർഷം ഉപയോഗിക്കുന്നത് 610 കോടി ഗാലൻ ശുദ്ധജലമാണെന്ന ഞെട്ടിക്കുന്ന വിവരമാണ് ഇപ്പോൾ പുറത്തുവരുന്നത്. ഗൂഗിളിന്റെ 2024-ലെ എൻവയോൺമെന്റൽ റിപ്പോർട്ടിലാണ് ഈ ഞെട്ടിക്കുന്ന കണക്കുകൾ കമ്പനി തന്നെ സമ്മതിച്ചിരിക്കുന്നത്. മുൻവർഷത്തേക്കാൾ 17 ശതമാനം അധികം ജലമാണ് കഴിഞ്ഞ വർഷം മാത്രം ഗൂഗിൾ ഡാറ്റ സെന്ററുകൾ കുടിച്ചുതീർത്തത്. ഇത് അമേരിക്കയിലെ ഏകദേശം 41 ഗോൾഫ് കോഴ്സുകൾ ഒരു വർഷം നനയ്ക്കാൻ ആവശ്യമായ വെള്ളത്തിന് തുല്യമാണ്.
ആർട്ടിഫിഷ്യൽ ഇന്റലിജൻസ് (AI) യുഗത്തിലേക്ക് ലോകം മാറുന്നതോടെ ഈ മെഷീനുകളുടെ ദാഹം ശമിപ്പിക്കുക എന്നത് വലിയ വെല്ലുവിളിയായി മാറുകയാണ്. നിങ്ങൾ ഒരു എഐ ചാറ്റ് ബോട്ടിനോട് ഒരു കവിത എഴുതാൻ ആവശ്യപ്പെടുമ്പോഴോ അല്ലെങ്കിൽ ഒരു ചിത്രം നിർമ്മിക്കാൻ ആവശ്യപ്പെടുമ്പോഴോ, ആയിരക്കണക്കിന് പ്രോസസറുകളാണ് ഒരേസമയം പ്രവർത്തിക്കുന്നത്. ഈ പ്രവർത്തനം വലിയ തോതിൽ ചൂട് പുറത്തുവിടുന്നു. ഈ കോടികൾ വിലയുള്ള യന്ത്രങ്ങൾ ഉരുകിപ്പോകാതിരിക്കാൻ ഡാറ്റ സെന്ററുകളിൽ കൂളിംഗ് ടവറുകൾ ഉപയോഗിക്കുന്നു. ചൂടായ പ്രതലങ്ങളിലൂടെ വെള്ളം പമ്പ് ചെയ്ത് ബാഷ്പീകരണത്തിലൂടെയാണ് (Evaporative cooling) ചൂട് കുറയ്ക്കുന്നത്. എന്നാൽ ഈ വെള്ളത്തിന്റെ 80 ശതമാനവും നീരാവിയായി അന്തരീക്ഷത്തിലേക്ക് അപ്രത്യക്ഷമാകുന്നു. ഈ ജലം പിന്നീട് പുനരുപയോഗിക്കാൻ കഴിയില്ലെന്നതാണ് പ്രധാന ഭീഷണി.
എന്തുകൊണ്ടാണ് ഇതിനായി ശുദ്ധജലം തന്നെ ഉപയോഗിക്കുന്നത് എന്ന ചോദ്യത്തിന് ലളിതമായ ഉത്തരമാണുള്ളത്. സാധാരണ വെള്ളത്തിലുള്ള കാൽസ്യം, മഗ്നീഷ്യം തുടങ്ങിയ മിനറലുകൾ വെള്ളം ആവിയാകുമ്പോൾ യന്ത്രങ്ങളിൽ പറ്റിപ്പിടിക്കുകയും ‘ലൈം സ്കെയിൽ’ (Limescale) എന്ന കടുത്ത പാളിയായി മാറുകയും ചെയ്യും. ഇത് വിലകൂടിയ ഹീറ്റ് എക്സ്ചേഞ്ചറുകളെ നശിപ്പിക്കും. മലിനജലം ഉപയോഗിച്ചാൽ ഈ പ്രശ്നം കൂടുതൽ രൂക്ഷമാകും എന്നതിനാലാണ് ഗൂഗിൾ ഉൾപ്പെടെയുള്ള കമ്പനികൾ മുനിസിപ്പാലിറ്റികൾ വിതരണം ചെയ്യുന്ന ശുദ്ധജലം തന്നെ ഇതിനായി ഉപയോഗിക്കുന്നത്. മോർഗൻ സ്റ്റാൻലിയുടെ റിപ്പോർട്ട് പ്രകാരം 2028 ആകുമ്പോഴേക്കും എഐ ഡാറ്റ സെന്ററുകളുടെ ജല ഉപഭോഗം 11 മടങ്ങ് വർദ്ധിക്കും. കുടിവെള്ളത്തിന് ദൗർലഭ്യം നേരിടുന്ന പല പ്രദേശങ്ങളിലും ഇത്തരം ഡാറ്റ സെന്ററുകൾ വരുന്നത് പ്രാദേശിക ജനജീവിതത്തെ സാരമായി ബാധിക്കുമെന്ന് കാലാവസ്ഥാ നിരീക്ഷകർ മുന്നറിയിപ്പ് നൽകുന്നു.
