സിംബാബ്വെക്കെതിരായ ടി20 ലോകകപ്പ് സൂപ്പർ-8 പോരാട്ടത്തിന് മുന്നോടിയായി ഇന്ത്യൻ ടീമിൽ രണ്ട് നിർണ്ണായക മാറ്റങ്ങൾ നിർദ്ദേശിച്ച് മുൻ താരം സുരേഷ് റെയ്ന. മലയാളി താരം സഞ്ജു സാംസണെയും അക്സർ പട്ടേലിനെയും പ്ലേയിംഗ് ഇലവനിൽ ഉൾപ്പെടുത്തണമെന്നാണ് റെയ്നയുടെ ആവശ്യം.
ടോപ്പ് ഓർഡറിലെ ഇടംകൈയ്യൻമാരുടെ അതിപ്രസരം കുറയ്ക്കാൻ സഞ്ജു സാംസണെ മൂന്നാം നമ്പറിൽ ഇറക്കണമെന്ന് റെയ്ന പറഞ്ഞു. തിലക് വർമ്മയ്ക്ക് പകരം സഞ്ജു സാംസണെ ടീമിലെടുക്കണമെന്ന് റെയ്ന നിർദ്ദേശിച്ചു. “ആദ്യം നിങ്ങൾ അക്സർ പട്ടേലിനെ തിരികെ കൊണ്ടുവരണം. മൂന്നാം നമ്പറിൽ തിലക് വേണോ സഞ്ജു വേണോ എന്നതാണ് അടുത്ത ചോദ്യം. സഞ്ജുവിനെ മൂന്നാം നമ്പറിൽ ഇറക്കണമെന്നാണ് എന്റെ അഭിപ്രായം. ടോപ്പ് ഓർഡറിൽ നിലവിൽ രണ്ട് ഇടംകൈയ്യൻമാരുണ്ട് (അഭിഷേക് ശർമ്മ, ഇഷാൻ കിഷൻ). സഞ്ജുവിനെപ്പോലൊരു വലങ്കൈയ്യൻ ബാറ്റർ വരുന്നത് ടീമിന് ഗുണം ചെയ്യും. സഞ്ജുവിന് ടീമിന്റെ ‘എക്സ്-ഫാക്ടർ’ ആകാൻ കഴിയും,” ജിയോ ഹോട്ട്സ്റ്റാറിലെ ചർച്ചയിൽ റെയ്ന പറഞ്ഞു.
കഴിഞ്ഞ രണ്ട് മത്സരങ്ങളിൽ വാഷിംഗ്ടൺ സുന്ദറിനെയാണ് ഇന്ത്യ കളിപ്പിച്ചത്. എന്നാൽ സിംബാബ്വെക്കെതിരെ വാഷിംഗ്ടണ് പകരം വൈസ് ക്യാപ്റ്റൻ അക്സർ പട്ടേൽ വരണമെന്ന് റെയ്ന ആവശ്യപ്പെട്ടു. അക്സർ ബാറ്റിംഗിലും ബൗളിംഗിലും മികച്ച ഫോമിലാണെന്നും അദ്ദേഹം ചൂണ്ടിക്കാട്ടി. കഴിഞ്ഞ മത്സരത്തിൽ ദക്ഷിണാഫ്രിക്കയോട് തോറ്റപ്പോൾ തിലക് വർമ്മ ഒരു റണ്ണും വാഷിംഗ്ടൺ സുന്ദർ വിക്കറ്റില്ലാതെ 17 റൺസും മാത്രമാണ് നേടിയത്.
ചെന്നൈയിൽ 200 റൺസ് നേടുക എളുപ്പമല്ലെന്നും അവിടെ മികച്ച ബാറ്റിംഗ് പുറത്തെടുക്കണമെന്നും റെയ്ന ഓർമ്മിപ്പിച്ചു. ദക്ഷിണാഫ്രിക്ക-വെസ്റ്റ് ഇൻഡീസ് മത്സരഫലം ഇന്ത്യയുടെ സെമി സാധ്യതകളെ ബാധിക്കുമെന്നും അദ്ദേഹം പറഞ്ഞു. മത്സരത്തിൽ വെസ്റ്റ് ഇൻഡീസ് തോൽക്കാനും ശേഷമുള്ള മത്സരത്തിൽ അവരെ തോൽപ്പിക്കാനും ഇന്ത്യ ആഗ്രഹിക്കുന്നു.
