മലയാളികളുടെ പ്രിയനടി മോഹിനി തന്റെ പഴയകാല ക്രഷ് വെളിപ്പെടുത്തിയ വാർത്ത സിനിമാ ലോകത്ത് ചർച്ചയാകുന്നു. സംഗീത മാന്ത്രികൻ എ.ആർ. റഹ്മാനോടുള്ള തന്റെ ആരാധനയെക്കുറിച്ചും അദ്ദേഹത്തെ വിവാഹം കഴിക്കാൻ ആഗ്രഹിച്ചിരുന്നതിനെക്കുറിച്ചും മനസ്സ് തുറന്നിരിക്കുകയാണ് താരം.
‘പഞ്ചാബി ഹൗസ്’, ‘ഈ പുഴയും കടന്ന്’ തുടങ്ങിയ ചിത്രങ്ങളിലൂടെ പ്രിയങ്കരിയായ നടി മോഹിനി, തനിക്ക് സംഗീത സംവിധായകൻ എ.ആർ. റഹ്മാനോടുണ്ടായിരുന്ന കടുത്ത പ്രണയത്തെക്കുറിച്ച് തുറന്നു പറഞ്ഞു. ഒരു തമിഴ് യൂട്യൂബ് ചാനലിന് നൽകിയ അഭിമുഖത്തിലാണ് താരം തന്റെ പഴയകാല ആഗ്രഹങ്ങൾ പങ്കുവെച്ചത്.
താൻ എ.ആർ. റഹ്മാന്റെ വലിയൊരു ആരാധികയായിരുന്നുവെന്ന് മോഹിനി പറയുന്നു. “അദ്ദേഹത്തോടുള്ളത് ഒരു ഭ്രാന്തമായ ഇഷ്ടമായിരുന്നു. അദ്ദേഹം മുസ്ലീം മതം സ്വീകരിച്ചു എന്നത് എനിക്ക് വലിയ ഹാർട്ട്ബ്രേക്ക് ഉണ്ടാക്കി. അന്ന് ഞാൻ ഹിന്ദുവായതുകൊണ്ട് അദ്ദേഹം ‘ദിലീപ്’ എന്ന പേരിൽത്തന്നെ തുടർന്നിരുന്നെങ്കിൽ വീട്ടിൽ വിവാഹത്തെക്കുറിച്ച് സംസാരിക്കാൻ എളുപ്പമാകുമായിരുന്നു എന്ന് ഞാൻ കരുതിയിരുന്നു,” മോഹിനി വെളിപ്പെടുത്തി. തല്ലും വഴക്കും ഇല്ലാതെ വിവാഹം കഴിക്കാമെന്ന് താൻ മനസ്സിൽ പ്ലാൻ ചെയ്തിരുന്നതായും താരം തമാശരൂപേണ പറഞ്ഞു.
റഹ്മാനെ വിവാഹം കഴിക്കാൻ ആഗ്രഹിച്ചപ്പോൾ മുതിർന്ന നടി ലക്ഷ്മി തന്നെ കളിയാക്കുമായിരുന്നുവെന്ന് മോഹിനി ഓർത്തെടുത്തു. “റഹ്മാന് ബിരിയാണി വലിയ ഇഷ്ടമാണ്, അതുകൊണ്ട് നീ ബിരിയാണി ഉണ്ടാക്കാൻ പഠിച്ചോളൂ എന്ന് ലക്ഷ്മി ആന്റി പറയുമായിരുന്നു. അദ്ദേഹത്തെ വിവാഹം കഴിക്കണമെങ്കിൽ ഇഷ്ടമുള്ള ഭക്ഷണം ഉണ്ടാക്കാൻ അറിഞ്ഞിരിക്കണമെന്ന് പറഞ്ഞ് അവർ എന്നെ എപ്പോഴും കളിയാക്കും.”
ഒരേയൊരു തവണ മാത്രമേ റഹ്മാനെ നേരിൽ കാണാൻ സാധിച്ചിട്ടുള്ളൂ എന്ന് മോഹിനി പറഞ്ഞു. മലേഷ്യയിൽ നടന്ന അദ്ദേഹത്തിന്റെ ആദ്യ മ്യൂസിക് ഷോയുടെ അവതാരക മോഹിനിയായിരുന്നു. ഷോ കഴിഞ്ഞ് വിമാനത്തിൽ തിരികെ വരുമ്പോൾ റഹ്മാൻ നേരിട്ട് തന്റെ അടുത്ത് വന്ന് ‘ഹലോ’ പറഞ്ഞ നിമിഷം ഇന്നും ഓർമ്മയിലുണ്ടെന്ന് താരം പറഞ്ഞു. മറ്റ് നിരവധി താരങ്ങൾ വിമാനത്തിൽ ഉണ്ടായിരുന്നെങ്കിലും ആരോടും മിണ്ടാതെ അദ്ദേഹം തന്റെ അടുത്ത് വന്ന് സംസാരിച്ചത് അത്ഭുതപ്പെടുത്തിയെന്നും മോഹിനി കൂട്ടിച്ചേർത്തു.
