എറണാകുളം : വെള്ളാപ്പള്ളി നടേശന് പത്മഭൂഷൺ പുരസ്കാരം നൽകരുതെന്ന് ഹൈക്കോടതിയിൽ ഹർജി. ശ്രീ നാരായണ ധർമ്മ പ്രബോധന ട്രസ്റ്റ് ആണ് ഹൈക്കോടതിയിൽ ഹർജി നൽകിയിരിക്കുന്നത്. ക്രിമിനൽ കേസ് അടക്കം നിരവധി കേസുകളിൽ പ്രതിയായ ഒരാൾക്ക് പുരസ്കാരം നൽകുന്നത് നിയമ വിരുദ്ധമാണെന്ന് ഹർജിയിൽ ആരോപിക്കുന്നു. വെള്ളാപ്പള്ളിക്ക് പുരസ്കാരം നൽകുന്നത് തടയണമെന്നും ശ്രീ നാരായണ ധർമ്മ പ്രബോധന ട്രസ്റ്റ് ഹൈക്കോടതിയോട് ആവശ്യപ്പെട്ടു.
മാരാരിക്കുളം പോലീസ് എടുത്ത ആത്മഹത്യ പ്രേരണ കേസിൽ വെള്ളാപ്പള്ളി നടേശൻ പ്രതിയാണെന്ന് ഹർജിയിൽ ആരോപിക്കുന്നു. കൂടാതെ മൈക്രോ ഫിനാൻസ് കേസുകളിലും എസ്.എൻ ട്രസ്റ്റ് കോളേജുകളിലെ പണമിടപാട് കേസുകളിലും വെള്ളാപ്പള്ളി പ്രതിയാണെന്നും ഹർജിയിൽ സൂചിപ്പിക്കുന്നുണ്ട്. ഹർജിയിൽ ഹൈക്കോടതി കേന്ദ്രസർക്കാരിന്റെ നിലപാട് തേടി. ഇതോടൊപ്പം സംസ്ഥാന സർക്കാരിനും വെള്ളാപ്പള്ളി നടേശനും കോടതി നോട്ടീസ് അയച്ചിട്ടുണ്ട്. രണ്ടാഴ്ചയ്ക്കുശേഷം കേസ് വീണ്ടും പരിഗണിക്കുന്നതാണ്.
