പാപ്പരാസികളുടെയും ക്യാമറക്കണ്ണുകളുടെയും ശ്രദ്ധയിൽപ്പെടാതെ തന്റെ മക്കളെ വളർത്താൻ ആഗ്രഹിക്കുന്ന വിരാട് കോഹ്ലിയുടെയും മകൻ അക്കായുടെയും സുന്ദരമായ വീഡിയോ പുറത്തുവന്നു. നോർത്ത് വെസ്റ്റ് ലണ്ടനിലെ ‘ദി അമാഡിയസ്’ പരിസരത്തുകൂടി മകന്റെ കൈപിടിച്ച് നടന്നുപോകുന്ന കോഹ്ലിയാണ് വീഡിയോയിലുള്ളത്.
2024-ൽ അക്കായ് ജനിച്ചതിനുശേഷം തന്റെ കുട്ടികളുടെ സ്വകാര്യത ഉറപ്പാക്കുന്നതിനായി കോഹ്ലി കുടുംബത്തോടൊപ്പം ലണ്ടനിലേക്ക് താമസം മാറിയിരുന്നു. പൊതുജനങ്ങളുടെയും ക്യാമറക്കണ്ണുകളുടെയും നിരന്തരമായ ശ്രദ്ധയിൽ നിന്ന് മാറി മക്കൾക്ക് സാധാരണ ജീവിതം നൽകാനാണ് താരം ഈ തീരുമാനമെടുത്തത്. വൈറലായ വീഡിയോയിൽ കോഹ്ലിയും അക്കായുമാണ് ഉള്ളത്. അനുഷ്ക ശർമ്മയും മകൾ വാമികയും വീഡിയോയിൽ ഇല്ല.
മൂത്തമകൾ വാമിക (5), മകൻ അക്കായ് (2) എന്നിവർക്ക് സാധാരണ കുട്ടിക്കാലം നൽകുന്നതിനായി വിരാടും അനുഷ്കയും കഴിഞ്ഞ കുറച്ചു കാലമായി ലണ്ടനിലാണ് താമസം. 2024 ഫെബ്രുവരി 15-നാണ് അക്കായ് ജനിച്ചത്. അക്കായുടെ ചിത്രം നേരത്തെയും സോഷ്യൽ മീഡിയയിൽ തെറ്റായ രീതിയിൽ പ്രചരിച്ചിരുന്നു. 2024-ൽ പെർത്തിൽ നടന്ന ടെസ്റ്റ് മത്സരത്തിനിടെ അനുഷ്കയുടെ കൂടെയുണ്ടായിരുന്ന സുഹൃത്തിന്റെ മകളെ അക്കായ് എന്ന് തെറ്റായി വ്യാഖ്യാനിച്ചപ്പോൾ വിരാടിന്റെ സഹോദരി ഭാവന തന്നെ തിരുത്തുമായി രംഗത്തെത്തിയിരുന്നു.
2024 നവംബറിൽ കോഹ്ലിയുടെ ജന്മദിനത്തിന് അനുഷ്ക പങ്കുവെച്ച ചിത്രത്തിൽ വിരാട് രണ്ട് കുട്ടികളെയും ചേർത്തുപിടിച്ചിരുന്നെങ്കിലും മുഖം ഇമോജി ഉപയോഗിച്ച് മറച്ചിരുന്നു. എന്നാൽ ലണ്ടൻ തെരുവിലെ ഈ വീഡിയോയിലൂടെ അക്കായെ ഒരു നോക്ക് കാണാൻ കഴിഞ്ഞതിന്റെ സന്തോഷത്തിലാണ് ആരാധകർ.
Virat Kohli with Akaay at London Streets 🥰❤️ pic.twitter.com/plGfX6PHWt
— Virat Kohli Fan Club (@Trend_VKohli) March 3, 2026
