രാഷ്ട്രീയ വിവാദങ്ങൾക്കും വ്യക്തിപരമായ ആരോപണങ്ങൾക്കും മറുപടി നൽകി മന്ത്രി കെ.ബി. ഗണേഷ് കുമാർ. “എനിക്ക് ഒന്നല്ല, അയ്യായിരം പ്രണയങ്ങളുണ്ട്” എന്ന മന്ത്രിയുടെ പ്രസ്താവന സോഷ്യൽ മീഡിയയിൽ ഇതിനോടകം വൈറലായിക്കഴിഞ്ഞു. തനിക്കെതിരെ ഉയരുന്ന ആരോപണങ്ങൾക്ക് പിന്നിൽ സ്വന്തം വീട്ടിലുള്ളവർ തന്നെയാണെന്നും ശത്രുക്കളെ പുറത്ത് തിരയേണ്ടതില്ലെന്നും ഗണേഷ് കുമാർ തുറന്നടിച്ചു. പത്തനാപുരത്ത് നടന്ന ഒരു പൊതുപരിപാടിയിൽ സംസാരിക്കവെയാണ് അദ്ദേഹം ഈ കാര്യം പറഞ്ഞത്. തനിക്കെതിരെ നിരന്തരം കുപ്രചരണങ്ങൾ അഴിച്ചുവിടുന്നവർക്ക് കൃത്യമായ മറുപടിയുണ്ടാകുമെന്നും അദ്ദേഹം മുന്നറിയിപ്പ് നൽകി.
സ്നേഹിക്കുന്നവർക്ക് വേണ്ടി എന്തുത്യാഗവും ചെയ്യാൻ തയ്യാറാണെന്നും എന്നാൽ തന്നെ തകർക്കാൻ നോക്കുന്നവരുടെ നീക്കങ്ങൾ വിജയിക്കില്ലെന്നും അദ്ദേഹം കൂട്ടിചേർത്തു. ഗണേഷ് കുമാറിന്റെ കുടുംബാംഗങ്ങൾക്കിടയിലെ സ്വത്ത് തർക്കവും രാഷ്ട്രീയ ഭിന്നതകളും നേരത്തെ തന്നെ വാർത്തകളിൽ ഇടംപിടിച്ചിരുന്നു. ഈ പശ്ചാത്തലത്തിലാണ് “ശത്രുക്കൾ വീട്ടിൽ തന്നെ” എന്ന പരാമർശം വലിയ ചർച്ചയായിരിക്കുന്നത്.തനിക്ക് ഒന്നല്ല അയ്യായിരം പ്രണയമുണ്ടെന്നും നിങ്ങളില് പ്രണയിക്കാത്തവര് ആരാണെന്നും ഗണേഷ് കുമാര് ചോദിച്ചു. പ്രണയിക്കാത്തവര് പൊട്ടന്മാരാണെന്നും ,തന്റെ വ്യക്തി ജീവിതത്തിൽ ഇടപെടാൻ ആർക്കും അവകാശമില്ലെന്നും ഇപ്പോൾ ഉയർന്ന ആരോപണങ്ങൾ തന്റെ ഭൂരിപക്ഷം കൂട്ടുമെന്നും പറഞ്ഞ മന്ത്രി വട്ട് മൂത്താൽ ആരും പരാതിപ്പെടുമെന്നും എനിക്കും വേണമെങ്കിൽ പരാതിപ്പെടാമെന്നും പറഞ്ഞു.
വിവാദങ്ങൾ കൊണ്ട് തന്നെ തളർത്താനാവില്ലെന്നും വികസന പ്രവർത്തനങ്ങളുമായി മുന്നോട്ട് പോകുമെന്നും അദ്ദേഹം വ്യക്തമാക്കി.
