ഇന്ത്യൻ സിനിമയുടെ ആഗോള സ്വീകാര്യത വെളിപ്പെടുത്തി ഫിൻലൻഡ് പ്രസിഡന്റ് അലക്സാണ്ടർ സ്റ്റബ്ബ്. തന്റെ ഔദ്യോഗിക സന്ദർശനത്തിനായി ഭാരതത്തിലേക്ക് തിരിക്കും മുൻപ് സൂപ്പർ ഹിറ്റ് ചിത്രമായ ‘ധുരന്ധർ’ താൻ കണ്ടിരുന്നുവെന്ന് അദ്ദേഹം വെളിപ്പെടുത്തി. വാർത്താ ഏജൻസിയായ എഎൻഐക്ക് നൽകിയ അഭിമുഖത്തിലാണ് അലക്സാണ്ടർ സ്റ്റബ്ബ് സിനിമയെക്കുറിച്ചുള്ള തന്റെ താൽപ്പര്യം പങ്കുവെച്ചത്. തന്റെ മകന്റെ നിർദ്ദേശപ്രകാരമാണ് സിനിമ കണ്ടതെന്നും ഭീകരവാദത്തിനെതിരായ പോരാട്ടം പ്രമേയമായ ചിത്രം തന്നെ ഏറെ ആകർഷിച്ചുവെന്നും അദ്ദേഹം പറഞ്ഞു. മാർച്ച് 19-ന് പുറത്തിറങ്ങുന്ന സിനിമയുടെ രണ്ടാം ഭാഗത്തിനായി താൻ കാത്തിരിക്കുകയാണെന്നും അദ്ദേഹം കൂട്ടിച്ചേർത്തു.
ആഗോള തലത്തിൽ വലിയ തരംഗമായ ‘ധുരന്ധർ’ കഴിഞ്ഞ വർഷം ഡിസംബറിലാണ് റിലീസ് ചെയ്തത്. ആ വർഷത്തെ ഏറ്റവും വലിയ കളക്ഷൻ നേടിയ ചിത്രമെന്ന റെക്കോർഡും ഈ ചിത്രം സ്വന്തമാക്കിയിരുന്നു. രണ്ടാം ഭാഗമായ ‘ധുരന്ധർ: ദി റിവഞ്ച്’ (Dhurandhar: The Revenge) റിലീസിനൊരുങ്ങുമ്പോൾ റെക്കോർഡ് മുൻകൂർ ബുക്കിംഗാണ് നടക്കുന്നത്. ശനിയാഴ്ച ആരംഭിച്ച ബുക്കിംഗിലൂടെ ഇതിനകം ഭാരതത്തിൽ നിന്ന് മാത്രം 12.29 കോടി രൂപ ചിത്രം സ്വന്തമാക്കി കഴിഞ്ഞു. ബ്ലോക്ക് ബുക്കിംഗ് ഉൾപ്പെടെ ഇത് 18.1 കോടി രൂപ കടക്കുമെന്നാണ് ഇൻഡസ്ട്രി ട്രാക്കറായ സാക്നിൽക് (Sacnilk) റിപ്പോർട്ട് ചെയ്യുന്നത്. വടക്കേ അമേരിക്ക ഉൾപ്പെടെയുള്ള വിദേശ വിപണികളിലും ചിത്രം കൊടുങ്കാറ്റായി മാറുകയാണ്. അമേരിക്കയിൽ മാത്രം പ്രീമിയർ ഷോകൾക്കായി 38,500-ലധികം ടിക്കറ്റുകൾ വിറ്റുപോയിട്ടുണ്ട്.
ശനിയാഴ്ച പുറത്തിറങ്ങിയ ട്രെയിലർ രൺവീർ സിംഗിന്റെ കൂടുതൽ കരുത്തുറ്റതും രൗദ്രവുമായ പ്രകടനമാണ് വാഗ്ദാനം ചെയ്യുന്നത്. ജസ്കിരാത്, ഹംസ എന്നീ രണ്ട് വ്യത്യസ്ത ഗെറ്റപ്പുകളിലാണ് രൺവീർ പ്രത്യക്ഷപ്പെടുന്നത്. വമ്പൻ ആക്ഷൻ രംഗങ്ങളും വയലൻസും നിറഞ്ഞ ട്രെയിലർ ആരാധകർക്കിടയിൽ വലിയ ആവേശം സൃഷ്ടിച്ചിട്ടുണ്ട്. രൺവീർ സിംഗിനൊപ്പം അർജുൻ രാംപാൽ, ആർ. മാധവൻ, സഞ്ജയ് ദത്ത് എന്നിവരും തങ്ങളുടെ വേഷങ്ങൾ രണ്ടാം ഭാഗത്തിൽ വീണ്ടും അവതരിപ്പിക്കുന്നു. ആദിത്യ ധർ സംവിധാനം ചെയ്യുന്ന ഈ ചിത്രം ദൃശ്യവിസ്മയമായിരിക്കുമെന്നാണ് വിലയിരുത്തപ്പെടുന്നത്.
