വാഷിംഗ്ടൺ: ഇറാനെതിരെ നടന്നുകൊണ്ടിരിക്കുന്ന യുദ്ധത്തിന് ഇതുവരെ ഏകദേശം 25 ബില്യൺ യുഎസ് ഡോളർ ചിലവായതായി മുതിർന്ന പെന്റഗൺ ഉദ്യോഗസ്ഥൻ വെളിപ്പെടുത്തി. രണ്ട് മാസമായി തുടരുന്ന ഈ സൈനിക നടപടിയെക്കുറിച്ചുള്ള വിവരങ്ങൾ ഹൗസ് ആംഡ് സർവീസസ് കമ്മിറ്റിക്ക് മുമ്പാകെയാണ് അദ്ദേഹം വ്യക്തമാക്കിയത്.
‘ഓപ്പറേഷൻ എപ്പിക് ഫ്യൂറി’ എന്ന പേരിൽ അറിയപ്പെടുന്ന ഈ നീക്കത്തിനായി ഏകദേശം 25 ബില്യൺ ഡോളർ ചിലവഴിച്ചതായി പെന്റഗൺ ആക്ടിംഗ് കൺട്രോളർ ജൂൾസ് ഹർസ്റ്റ് III പറഞ്ഞു. പ്രതിരോധ സെക്രട്ടറി പീറ്റ് ഹെഗ്സെത്ത്, ജോയിന്റ് ചീഫ് ഓഫ് സ്റ്റാഫ് ചെയർമാൻ ജനറൽ ഡാൻ കെയ്ൻ എന്നിവരോടൊപ്പം മൊഴി നൽകവെയാണ് അദ്ദേഹം ഇക്കാര്യം അറിയിച്ചത്.
യുദ്ധോപകരണങ്ങൾ, സൈനിക പ്രവർത്തനങ്ങൾ, അറ്റകുറ്റപ്പണികൾ, തകരാർ സംഭവിച്ച ഉപകരണങ്ങൾക്ക് പകരമുള്ളവ വാങ്ങൽ എന്നിവയ്ക്കാണ് ഈ തുകയുടെ ഭൂരിഭാഗവും വിനിയോഗിച്ചതെന്ന് ഹർസ്റ്റ് കൂട്ടിച്ചേർത്തു. നേരത്തെ പുറത്തുവന്ന റിപ്പോർട്ടുകൾ പ്രകാരം, യുദ്ധത്തിന്റെ ആദ്യ ആറ് ദിവസത്തിനുള്ളിൽ തന്നെ 11.3 ബില്യൺ ഡോളർ ചിലവായതായി സൂചിപ്പിച്ചിരുന്നു.
ഹിയറിംഗിനിടെ, ഭരണകക്ഷിയായ റിപ്പബ്ലിക്കൻ അംഗങ്ങൾ പ്രസിഡന്റ് ഡൊണാൾഡ് ട്രംപിന്റെ തീരുമാനത്തെ പിന്തുണച്ചപ്പോൾ, യുദ്ധത്തിന്റെ ലക്ഷ്യങ്ങളെയും സാമ്പത്തിക പ്രത്യാഘാതങ്ങളെയും ചൊല്ലി ഡെമോക്രാറ്റുകൾ രൂക്ഷമായ വിമർശനം ഉയർത്തി. എന്നാൽ, യുദ്ധം എത്രകാലം നീണ്ടുനിൽക്കുമെന്നോ ആകെ എത്ര തുക ചിലവാകുമെന്നോ വ്യക്തമാക്കാൻ പ്രതിരോധ സെക്രട്ടറി തയ്യാറായില്ല. അതേസമയം, 2027 സാമ്പത്തിക വർഷത്തേക്ക് 1.5 ട്രില്യൺ ഡോളറിന്റെ റെക്കോർഡ് പ്രതിരോധ ബജറ്റാണ് പെന്റഗൺ നിർദ്ദേശിച്ചിരിക്കുന്നത്.
