ഇറാൻ്റെ പരമോന്നത നേതാവായിരുന്ന ആയത്തുള്ള അലി ഖമേനിയുടെ മരണത്തിന് പിന്നാലെ അധികാരം ഏറ്റെടുത്ത മകൻ മുജ്തബ ഖമേനിക്ക് ആക്രമണത്തിൽ പരിക്കേറ്റതായി സ്ഥിരീകരണം. ഇറാനിയൻ സ്റ്റേറ്റ് ടെലിവിഷനാണ് ലോകത്തെ ഞെട്ടിച്ച ഈ വാർത്ത പുറത്തുവിട്ടത്. ഔദ്യോഗിക വസതിക്ക് സമീപമുണ്ടായ ശക്തമായ സ്ഫോടനത്തിലാണ് മുജ്തബയ്ക്ക് പരിക്കേറ്റതെന്നാണ് വിവരം. ഖമേനിയുടെ മരണത്തിന് പിന്നാലെ ഇറാനിൽ ഭരണമാറ്റം നടക്കുന്നതിനിടെയുണ്ടായ ഈ നീക്കം രാജ്യത്തെ കൂടുതൽ അസ്ഥിരതയിലേക്ക് തള്ളിയിരിക്കുകയാണ്. ഇസ്രയേൽ രഹസ്യാന്വേഷണ ഏജൻസിയായ മൊസാദ് ആണ് ഈ നീക്കത്തിന് പിന്നിലെന്നാണ് പ്രാഥമിക നിഗമനം.
അലി ഖമേനിയുടെ മരണശേഷം ഇറാൻ്റെ കമാൻഡ് ഏറ്റെടുത്ത മുജ്തബ ഖമേനി, രാജ്യത്തെ സൈനിക-രാഷ്ട്രീയ നീക്കങ്ങളുടെ ചുക്കാൻ പിടിക്കുന്നതിനിടെയാണ് ആക്രമണത്തിന് ഇരയായത്. അദ്ദേഹത്തെ അതീവ സുരക്ഷിതമായ രഹസ്യ കേന്ദ്രത്തിലേക്ക് മാറ്റിയതായും വിദഗ്ധ ചികിത്സ നൽകി വരികയാണെന്നും റിപ്പോർട്ടുകൾ സൂചിപ്പിക്കുന്നു. ആക്രമണത്തിന്റെ സ്വഭാവത്തെക്കുറിച്ച് ഇറാൻ ഔദ്യോഗികമായി കൂടുതൽ വിവരങ്ങൾ വെളിപ്പെടുത്തിയിട്ടില്ലെങ്കിലും, അത്യാധുനിക ഡ്രോണുകൾ ഉപയോഗിച്ചുള്ള കൃത്യമായ ആക്രമണമാണ് നടന്നതെന്നാണ് അന്താരാഷ്ട്ര നിരീക്ഷകർ വിലയിരുത്തുന്നത്. ഇറാന്റെ പരമോന്നത നേതൃത്വത്തെ ഒന്നൊന്നായി ഇല്ലാതാക്കാനുള്ള ഇസ്രയേലിന്റെ തന്ത്രപരമായ നീക്കമാണിതെന്ന് കരുതപ്പെടുന്നു.
സംഭവത്തിന് പിന്നാലെ ഇറാൻ റെവല്യൂഷണറി ഗാർഡ്സ് (IRGC) രാജ്യത്ത് അതീവ ജാഗ്രതാ നിർദ്ദേശം നൽകി. തിരിച്ചടി നൽകുമെന്ന് ഇറാൻ സൈനിക നേതൃത്വം ആവർത്തിക്കുന്നുണ്ടെങ്കിലും, പുതിയ നേതാവിന് നേരെ ഉണ്ടായ ആക്രമണം രാജ്യത്തിൻ്റെ ആത്മവിശ്വാസത്തിന് വലിയ പ്രഹരമായിട്ടുണ്ട്. പശ്ചിമേഷ്യയിൽ ഇസ്രയേലും ഇറാനും നേരിട്ടുള്ള യുദ്ധത്തിലേക്ക് നീങ്ങുന്നതിൻ്റെ സൂചനകളാണ് ഈ പുതിയ സംഭവവികാസങ്ങൾ നൽകുന്നത്. മുജ്തബയുടെ പരിക്കിന്റെ ഗുരുതരാവസ്ഥ പുറത്തുവിട്ടിട്ടില്ലാത്തതിനാൽ ഇറാന്റെ ഭാവി ഭരണത്തെക്കുറിച്ച് വലിയ ആശങ്കയാണ് നിലനിൽക്കുന്നത്.
