പശ്ചിമേഷ്യയിൽ യുദ്ധസമാനമായ സാഹചര്യം നിലനിൽക്കുന്ന പശ്ചാത്തലത്തിൽ പ്രധാനമന്ത്രി നരേന്ദ്ര മോദി ഇറാൻ നേതൃത്വവുമായി നടത്തിയ ചർച്ചകളെ പ്രശംസിച്ച് മുതിർന്ന കോൺഗ്രസ് നേതാവും മുൻ നയതന്ത്രജ്ഞനുമായ ശശി തരൂർ. ആഗോളതലത്തിൽ വലിയ സ്വാധീനമുള്ള മേഖലയിലെ പ്രശ്നങ്ങളിൽ ഇന്ത്യക്ക് നിഷ്ക്രിയരായി ഇരിക്കാൻ സാധിക്കില്ലെന്നും പ്രധാനമന്ത്രിയുടെ ഇടപെടൽ ശരിയായ ദിശയിലുള്ളതാണെന്നും തരൂർ വ്യക്തമാക്കി.
പശ്ചിമേഷ്യൻ സംഘർഷം കേവലം പ്രാദേശികമായ ഒന്നല്ലെന്നും അത് ഇന്ത്യയുടെ സാമ്പത്തിക-ഊർജ്ജ മേഖലകളെ നേരിട്ട് ബാധിക്കുന്നതാണെന്നും ശശി തരൂർ ചൂണ്ടിക്കാട്ടി. “പശ്ചിമേഷ്യയിലെ സംഭവവികാസങ്ങൾ നിഷ്ക്രിയമായി നോക്കി നിൽക്കാൻ ഇന്ത്യക്കാവില്ല. അവിടെയുള്ള ദശലക്ഷക്കണക്കിന് ഇന്ത്യൻ പൗരന്മാരുടെ സുരക്ഷയും നമ്മുടെ ഊർജ്ജ ആവശ്യങ്ങളും ഇതിൽ ഉൾപ്പെടുന്നു. ഇറാനുമായുള്ള ചർച്ചകൾ ഈ സാഹചര്യത്തിൽ അങ്ങേയറ്റം സ്വാഗതാർഹമാണ്,” – തരൂർ പറഞ്ഞു.
പ്രധാനമന്ത്രി നരേന്ദ്ര മോദിയും ഇറാൻ പ്രസിഡന്റ് മസൂദ് പെസെഷ്കിയാനും തമ്മിലുള്ള സംഭാഷണത്തിന് പിന്നാലെയാണ് തരൂരിന്റെ ഈ പ്രതികരണം വന്നത് എന്നത് ശ്രദ്ധേയമാണ്. റഷ്യൻ എണ്ണ ഇറക്കുമതിയിൽ അമേരിക്ക ഇന്ത്യക്ക് താൽക്കാലിക ഇളവ് നൽകിയതും പശ്ചിമേഷ്യയിലെ ചരക്ക് കപ്പലുകൾക്ക് നേരെയുള്ള ആക്രമണങ്ങളും ഈ ചർച്ചകളിൽ നിർണ്ണായകമായിരുന്നു.
മേഖലയിലെ സമാധാനം പുനഃസ്ഥാപിക്കാൻ ഇന്ത്യയുടെ ഇടപെടൽ അത്യാവശ്യമാണെന്ന് അദ്ദേഹം ഓർമ്മിപ്പിച്ചു. നയതന്ത്ര തലത്തിലുള്ള ഇത്തരം നീക്കങ്ങൾ വഴി ആഗോള തലത്തിൽ ഇന്ത്യയുടെ പ്രതിച്ഛായ വർദ്ധിപ്പിക്കാൻ സാധിക്കുമെന്നും അദ്ദേഹം കൂട്ടിച്ചേർത്തു.
