ന്യൂസിലൻഡിനെ തകർത്ത് ഇന്ത്യ ടി20 ലോകകപ്പ് കിരീടം നേടിയപ്പോൾ രണ്ട് പേരായിരുന്നു വിജയത്തിന്റെ മുഖ്യ ശില്പികൾ—ബാറ്റിംഗിൽ തകർത്താടിയ മലയാളി താരം സഞ്ജു സാംസണും ബൗളിംഗിൽ മാജിക് തീർത്ത ജസ്പ്രീത് ബുംറയും. ഫൈനലിൽ ഇന്ത്യ ഉയർത്തിയ 255 റൺസ് പിന്തുടർന്ന ന്യൂസിലൻഡ് 96 റൺസിന് പരാജയപ്പെടുകയായിരുന്നു.
ഫൈനലിൽ 89 റൺസുമായി ഇന്ത്യയുടെ ടോപ്പ് സ്കോററായ സഞ്ജു സാംസൺ ആണ് ടീമിനെ കൂറ്റൻ സ്കോറിലേക്ക് നയിച്ചത്. സൂപ്പർ 8 ഘട്ടം മുതൽ തുടർച്ചയായി മൂന്ന് അർദ്ധസെഞ്ചുറികൾ നേടിയ സഞ്ജുവിനെ ടൂർണമെന്റിലെ മികച്ച താരമായി തിരഞ്ഞെടുത്തു. തനിക്ക് ലഭിച്ച അവസരങ്ങൾ കൃത്യമായി വിനിയോഗിച്ച സഞ്ജു ഇന്ത്യൻ ബാറ്റിംഗിന്റെ നെടുംതൂണായി മാറി.
സഞ്ജുവിനെ പ്ലെയർ ഓഫ് ദി ടൂർണമെന്റായി തിരഞ്ഞെടുത്തപ്പോൾ, ആ പുരസ്കാരത്തിന് ബുംറയും തുല്യ അർഹനായിരുന്നു എന്ന് ദക്ഷിണാഫ്രിക്കൻ ഇതിഹാസം എബി ഡിവില്ലിയേഴ്സ് അഭിപ്രായപ്പെട്ടു. തന്റെ യൂട്യൂബ് ചാനലിലൂടെയായിരുന്നു അദ്ദേഹത്തിന്റെ പ്രതികരണം.
“സഞ്ജുവും ബുംറയും തമ്മിൽ പുരസ്കാരത്തിനായി വലിയ പോരാട്ടമായിരുന്നു. ബുംറ ചില നിർണ്ണായക ഓവറുകൾ എറിഞ്ഞ രീതി അത്ഭുതകരമാണ്. സെമിഫൈനലിലും ഫൈനലിലും അദ്ദേഹം മറ്റൊരു ഗ്രഹത്തിൽ നിന്നുള്ള ബൗളറെപ്പോലെയാണ് പന്തെറിഞ്ഞത്. സഞ്ജു മികച്ച ടൂർണമെന്റാണ് കാഴ്ചവെച്ചത്, പക്ഷേ ബുംറയ്ക്ക് കുറച്ചുകൂടി പരിഗണന ലഭിക്കേണ്ടിയിരുന്നു,” ഡിവില്ലിയേഴ്സ് പറഞ്ഞു.
